Норвегия украинларга автоматик равишда бошпана беришни тўхтатади

Норвегия ҳукумати жума куни барча украиналикларга автоматик бошпана беришни тўхтатишини эълон қилди. Энди Украинанинг ғарбий областлари – Лвив, Волин, Ивано-Франкивск, Тернопил, Ровно ва Карпатортидан келган қочқинларнинг аризалари алоҳида кўриб чиқилади, деб хабар беради RTE. Норвегия ҳукумати бу ҳудудларни хавфсиз деб ҳисоблайди, чунки улар фронтдан узоқда.

Норвегия адлия вазири Эмилия Энгер Мелнинг таъкидлашича, 5,6 миллион аҳолига эга мамлакат кенг кўламли уруш бошланганидан бери 85 мингга яқин украиналик қочқинларни қабул қилган — бу баъзи шаҳарларда уй-жой, соғлиқни сақлаш ва мактаблар учун ортиб бораётган юкламани келтириб чиқаради. Мел, шунингдек, бошпана изловчилар орасида ҳарбий ёшдаги эркаклар улуши ортиб бораётганини, Украина эса Россия тажовузини қайтариш учун аскарларни ёллашга уринаётганини қайд этди.

Урушнинг дастлабки ойларида Норвегия барча украиналикларга бошпана берган, бироқ кейин қоидаларни кучайтира бошлаган. Август ойида қабул қилиш марказларида жойлашмасдан, мустақил равишда ўз турар жойларини ташкил этган қочқинлар 520 евро ойлик нафақадан маҳрум бўлди. Бундай марказларда яшовчилар учун Норвегия ҳукумати уй ҳайвонларини сақлаш харажатларини қоплашни тўхтатди. Шу билан бирга, Норвегиядан Украинага қайтишга қарор қилганларга 1500 евро миқдорида бир марталик тўлов берила бошланди.

Сентябр ойида Осло оғир яраланган украиналикларни Европага тиббий эвакуация қилиш дастури учун деярли 9 миллион евро ажратиши маълум бўлди. Мамлакат бош вазири Йонаса Гар Стёренинг сўзларига кўра, уруш вақтида Норвегия самолётлари 1931 нафар ярадор украиналикни эвакуация қилган – бу Украинадан Европага даволаниш учун олиб келинганларнинг деярли ярми.