Ўзбекистоннинг Британиядаги элчиси Абдуқодир Ҳусанов билан учрашди

Ўзбекистоннинг Буюк Британиядаги элчиси Равшан Усмонов «Манчестер Сити» футбол клубида топ суришни бошлаган Абдуқодир Ҳусанов билан учрашди, деб хабар беради «Дунё» агентлиги.

Қайд этилишича, учрашувда ёш ўзбекистонликнинг футболдаги карераси, ўзбек диаспорасининг қўллаб-қувватлови ва келажакдаги режалар муҳокама қилинган.

Элчи Абдуқодир Ҳусанов ўзбек футболнинг фахрига айланганини таъкидлаб, унинг энг кучли лигалардан биридаги йўли ёш авлодни илҳомлантиришига ишонч билдирган. Ўз навбатида, футболчи Ўзбекистонни жаҳон ареналарида шараф билан намоён этиш учун янада кўпроқ меҳнат қилишга ваъда берган.

Шунингдек, учрашувда Ўзбекистонда футболни ривожлантиришга ва ёш иқтидорларни қўллаб-қувватлашга йўналтирилган ижтимоий лойиҳалар ҳам муҳокама қилинган.

Эслатиб ўтамиз, Шавкат Мирзиёев январ охирларида Бирлашган Араб Амирликларига қилган сафари чоғида «Манчестер Сити» клуби эгалари саналмиш Абу Даби валиаҳд шаҳзодаси Шайх Холид ибн Муҳаммад Ол Наҳаён билан учрашган эди. Ўзбекистон президенти Абу Даби валиаҳд шаҳзодаси Шайх Холид ибн Муҳаммад Ол Наҳаён билан учрашувда Абдуқодир Ҳусановнинг «Манчестер Сити» клубига ўтиши ҳақида ҳам суҳбатлашган.

Маълумот учун, Ҳусанов Англия Премер-лигасида тўп сурадиган илк ўзбек футболчисига айланди. У трансфер борасида ҳам ўзбек футболчиларининг рекордини янгилади.