Хонадонида шер боласини ноқонуний сақлаб келган фуқаро аниқланди

Бухоро вилояти Ромитан туманида ноқонуний сақланган шер боласи ҳайвонот боғига топширилди.

Фото: Тошкент вилояти Экология бошқармаси

Вилоят Экология бошқармаси маълум қилишича, Ромитан туманининг Қоқиштувон маҳалласида яшовчи фуқаро ўз хонадонида ёввойи шер боласини ноқонуний равишда сақлаб келаётгани аниқланган.

Мазкур ҳолат Бухоро вилояти Экология бошқармаси, туман ички ишлар бўлими ва Миллий гвардия ходимлари томонидан ўрганилди. Текширув натижасида фуқаро тегишли рухсатномасиз ёввойи ҳайвонни асраб келаётгани тасдиқланди.

Ҳолат юзасидан Маъмурий жавобгарлик тўғрисидаги кодекснинг 92-моддаси 1-қисми асосида ҳуқуқбузарга нисбатан маъмурий баённома расмийлаштирилиб, иш суд органларига юборилди.

Шер боласи эса вақтинчалик ҳайвонот боғига жойлаштирилди. Суд қарори эълон қилинганидан сўнг қўшимча маълумот тақдим этилади.

#шер #Ромитан