Шу кунларда YouTube-каналларда, машинада кетаётиб радиони ёққанингизда ёки телевизорда футбол каналини қидираётиб, янгиликлар дастурига тушиб қолганингизда Мюнхен конференцияси деган сўзга тез-тез дуч келаётган бўлсангиз керак. Одатда янгиликларда бу конференция ҳақида номигагина хабар бериб кетишади. Лекин ишонинг, бу жуда жиддий сиёсий машварат.
Киноларда массонлар ҳар хил қоятошлар ичидаги махфий қалъаларда йиғилиб, дунё тартиботидаги ўзгаришларни белгилаб берганини кўрган бўлсангиз керак. Мюнхен конференциясида ҳам шунақа бўлади демоқчи эмасман, лекин бу йиғилишларда дунё сиёсатини яқин келажакда нималар кутаётганига ишора қиладиган баёнотлар берилади.
YouTube-каналимизда юкланган навбатдаги видеомизни охиригача томоша қилсангиз, Мюнхен конференцияси нимаси билан аҳамиятли экани, бу йилги конференцияда қандай жиддий масалалар муҳокама қилинганини билиб оласиз. Илтимос, видеога like босинг, кўриб бўлгач, изоҳларда фикрингизни қолдиринг. Шу орқали каналимиз ривожланишига ёрдам берган бўласиз.
Путиннинг тарихий чиқиши
Аввало Мюнхен конференцияси дунё сиёсати учун қанчалик аҳамиятли эканига тўхталсак. Бу учун конференция яратилиш тарихи-ю, унга асос солганлар ҳақида узундан узун ваъз ўқиш шарт эмас, конференция тарихидаги энг машҳур нутқни мисол қилсак кифоя.
Демак, 2007 йил 10 феврал. Мюнхендаги конференция минбарига Россия иккинчи президенти, ўша вақтдаги мамлакат конституциясига кўра охирги муддатида ишлаётган Владимир Путин таклиф қилинади. «Умид қиламан, менинг нутқим вақтида ана у қизил тугмани босиб, микрофонни ўчириб қўйишмайди», деб бошлайди нутқини Путин. Кейин Россия президенти шундай нарсаларни гапирадики, Ангела Меркел бошчилик европаликлар оғзини очиб қолади. Путин илк марта халқаро минбарда туриб айнан Мюнхен конференциясида дунё бир қутбли моделдан воз кечиши кераклигини тантанавор эълон қилади. Яъни европаликларга ҳамманг Америка чизган чизиқдан чиқмаяпсан, дейди қоғозга ўраб. Шунингдек, НАТОнинг кенгайиши инсониятга фақат хавф олиб келишини айтади.
Путин нутқи давомида ҳеч бир давлатни очиқчасига фалон ишни қилдинг, деб айбламайди, лекин унинг сўзларидан кейин америкалик сиёсатчилар бир хулосага келишади: совуқ уруш тикланди. Кўпчилик сиёсатчилар Путиннинг ўша нутқи Ғарб ва Россия ўртасидаги душманликнинг бошланиши деб ҳисоблайди. Путин гаплари йиллар давомида ўрганилади, унга Мюнхен нутқи деб ном ҳам беришади. Ва ҳозир дунёда содир бўлаётган воқеалар ўша нутқдан кейин келинган хулосалар тўғри бўлганини кўрсатиб турибди.
