Эд Ширан 2026 йил январидан буён ўзининг саккизинчи «Play» албоми учун жаҳон бўйлаб Loop номли концерт гастроли ўтказмоқда. Шу пайтгача хонанда Австралия, Янги Зеландия, Европа ва АҚШнинг бир қанча майдонларида чиқиш қилди.
Тур давомида Ширанга концерт вақтида томошабинларни жонлантириши учун бир неча артистлар ҳам ҳамроҳлик қилмоқда. Улардан бири – репэр Macklemore (ҳақиқий исми – Бен Ҳаггерти) – 4 сентябр куни Ню Жерсида уюштирилган концертда қўшиқлар орасида Фаластинни қўллаган ҳолда қисқа нутқ ирод қилди. У саҳнада туриб, Ғазо ҳамда ишғол этилган Ғарбий соҳил аҳолисига улар «унутилмагани»ни эслатмоқчилигини айтди:
Бу турга боришни хоҳлаганимнинг асосий сабабларидан бири – шундай стадионларга чиқиш ва юрагимга жуда яқин ва қадрли бўлган икки сўзни айтиш имкониятидир: «Фаластинга озодлик!»
Кейинги куни мусиқачи яҳудий тингловчиларга мурожаат қилди: «Исроил, апартеид ва геноцидни танқид қилиш сизга қарши танқид эмас».
Шундан сўнг, Шираннинг АҚШдаги тури ташкилотчиси бўлган Messina Touring Group компанияси концерт майдонлари эгаларидан Macklemore иштирокидаги концертга рухсат бермаслик тўғрисида билдиришномалар ола бошлади. Ширан концерт бериши режалаштирилган Филаделфия, Бостон, Атланта, Шарлотта, Индианаполис, Даллас ва Тампадаги стадионлар вакиллари ҳам бунга қарши чиқди.
Натижада Macklemore гастролдан четлаштирилди, қолган ижрочилар эса бирдамлик белгиси сифатида ўз иштирокларини тўхтатишди. Дастлаб ирландиялик қўшиқчи Аарон Роу ҳамда ирландларнинг Beoga номли гуруҳи (асосий концертда Ширан билан бирга бир неча қўшиқ ижро этадиган гуруҳ) шундай қарорга келганини маълум қилди. «Ирландлар сифатида биз геноцид, мажбурий очарчилик ва шафқатсиз оккупация ҳақида жуда яхши биламиз», – деб ёзди Роу. Шунингдек, данияликларнинг Lukas Graham гуруҳи ва америкалик мусиқачи, қўшиқчи Билли Айлишнинг акаси бўлган Finneas ҳам гастролда қатнашишдан бош тортди.
Scott Eisen / Getty Images
Macklemore’ни кимлар танқид қилди ва нима учун?
Кейинроқ Ширан Macklemore’ни четлатиш тўғрисидаги қарор турнинг Америкадаги қисми промоутери Messina Touring Group томонидан қабул қилинганини айтди. Шу билан бирга, хонанда «Macklemore’нинг ўз эътиқодларини ҳимоя қилиш ва бу ҳақида баланд овозда гапириш қарори»ни ҳурмат қилиши, аммо «ўз профессионал платформасидан сиёсий баёнотлар учун фойдаланмаслик»ни афзал кўришини таъкидлади.
