Тошкентда ҳайдовчи ухлаб қолиши оқибатида Lacetti учта машина билан тўқнашди

Яшнобод тумани Махтумқули кўчасида Lacetti автомобили олдинда кетаётган учта машинага бориб урилди. ЙҲХБ маълумотига кўра, ҳайдовчи рулда ухлаб қолган.

Фото: Видеодан кадр

19 февраль куни эрталаб Тошкентнинг Махтумқули кўчасида Lacetti автомобили олдинда ҳаракатланаётган машиналарга урилиб кетди.

Видеорегистраторлардан олинган ёзувларда седаннинг зич ва секин ҳаракатланаётган оқимда тезлик билан Lada ва Cobalt орасидан ўтиб, уларга шикаст етказганини кўриш мумкин. Сўнгра у Malibu`га бориб урилган.

Пойтахт ИИББ ЙҲХБ хабар беришича, ЙТҲга ҳайдовчининг рулда ухлаб қолиши сабаб бўлган. Жабрланганлар йўқ. Тергов бошланди.

Маълумот учун, Махтумқули кўчаси Тошкент вилоятидан пойтахт марказига олиб боради.