«Аёлга эҳтиром» ҳафталиги ўтказилади

Вазирлар Маҳкамасининг тегишли баёнига мувофиқ, 8 март — Халқаро хотин-қизлар куни муносабати билан 3-10 март кунлари «Аёлга эҳтиром» ҳафталиги ўтказилади. Бу ҳақда Оила ва хотин-қизлар қўмитаси хабар берди.

Ҳафталик доирасида хотин-қизларни қўллаб-қувватлаш, уларнинг ҳуқуқ ва қонуний манфаатларини ҳимоя қилиш, иқтисодий, ижтимоий ва сиёсий фаоллигини ошириш, бандлигини таъминлаш, тадбиркорликка кенг жалб этиш, эҳтиёжманд хотин-қизларни ижтимоий қўллаб-қувватлашга қаратилган кенг кўламли тадбирлар, ислоҳотларнинг амалий натижаларини ўзида мужассам этган медиатанловлар ва тадбирлар ўтказиш назарда тутилган.

Жумладан:

- Жамият ва давлат ҳаётида фаоллик ва ташаббускорлик кўрсатган, ўзининг самарали меҳнати билан жамият ривожига муносиб ҳисса қўшаётган хотин-қизларни «Мўътабар аёл» кўкрак нишони билан тақдирлаш маросимларини ташкил этилади;

- Узоқ йиллар вазирлик ва идораларда ишлаб фидойилик, ватанпарварлик, ибрат намунасини кўрсатиб хизмат қилган кекса аёллар, «Аёллар дафтари» ва «Ёшлар дафтари»га киритилган хотин-қизлар «Янги Ўзбекистон боғи» ҳамда музейлар, тарихий масканлар, обидалар, зиёратгоҳ ва қадамжолар, театр, концерт, кино, кўнгилочар масканларга имтиёзли асосда ташрифлари ташкил этилади;

- Хотин-қизларни қўллаб-қувватлаш, уларнинг ижтимоий фаолликларини оширишга қаратилган турли китоб ва рисолалар тақдимотлари ўтказилади.

Шунингдек, умумтаълим мактаблари ўқувчилари ўртасида «Она - оиламиз тимсоли, меҳр булоғи» мавзусида иншолар танлови ўтказиш назарда тутилган.

Ижтимоий тармоқларда ёшлар иштирокида «Аёлни эъзозлаш – эзгулик ва адолат мезони», «Она – меҳр булоғи», «Мен онам билан фахрланаман», «Юрт тараққиётига менинг ҳиссам» мавзуларида флешмоб ва челленж ташкил этилади.

«Доим эътибордасиз!» шиори остида «Тиббиёт автобуслари» ташкил этилади ва маҳаллаларда ижтимоий ҳимояга муҳтож хотин-қизлар чуқурлаштирилган тиббий кўрикдан ўтказилади.

Жазони ижро этиш муассасаларида маънавий-маърифий тадбирлар ташкил этилади.

Вазирликлар ва идораларда, корхона ва ташкилотларда фаолият кўрсатаётган хотин-қизлар ўртасида «Спорт нафислик ва саломатлик манбаи» шиори остида спорт мусобақалари ўтказилади.

Жойларда «Табаррук онахонларни эъзозлайлик!» мавзуида тадбирлар ўтказилади. Узоқ йиллар халқ фаровонлиги йўлида меҳнат қилган, халқ тинчлиги йўлида ҳалок бўлганларнинг оналари, турмуш ўртоқлари ва қизларига байрам совғаларини ташкил этилади.

Маҳаллаларда истиқомат қилаётган шоиралар, ёзувчи ва санъаткорлар ўртасида «Назм гулшани», «Қалам сеҳри», «Онажонлар мўътабар», «Миллий рақс – мунаввар қадрият» мавзусида кўрик-танловлар ўтказилади.

Вазирликлар ва идораларда, корхона ва ташкилотларда узоқ йиллардан буён фидойилик билан меҳнат қилаётган аёллар иштирокида "Матонат тимсоллари" мавзусида мулоқот учрашувлари ўтказилади.

Раҳбар аёллар ва лидерлик салоҳиятига эга бўлган хотин-қизлар, шунингдек, етакчи тадбиркор аёлларнинг маҳаллаларда «Аёллар дафтари»га киритилган ишсиз ва тадбиркорликни бошлаш истагида бўлган хотин-қизлар билан мулоқот учрашувлари ташкил этилади.

«Ўзбекистон – умумий уйимиз» шиори остида маҳаллаларда турли миллат вакиллари бўлган хотин-қизлар иштирокида маданий-маърифий тадбирлар ўтказилади.

Ҳудудларда «Янги Ўзбекистонни барпо этишда хотин-қизларнинг ўрни» мавзусида маънавий-маърифий тадбирлар бўлиб ўтади.

«Оқила аёллар» ҳаракати ҳамда Оила ва хотин-қизлар қўмитаси ҳузуридаги «Аёл маърифати» жамоатчилик кенгаши аъзолари иштирокида «Аёл маънавияти», «Оналик бахти», «Муаммоли вазиятлар ва оқилона ечим», «Мулоқот психологияси», «Соғлом овқатланиш», «Соғлом турмуш тарзи» каби мавзуларда; «Томорқаларда гул ва мева-сабзавотларни етиштириш, иссиқхоналарни ташкил этишда ижобий тажрибалар» мавзусида; «тикувчилик», «пазандалик», «тўқиш» каби йўналишларда маҳаллаларда маҳорат дарслари, семинар-тренинглар ташкил этилади.