Хусусан, Навбаҳор туманидаги “Paradice Garden” МЧЖнинг узумни қайта ишлаш ва шарбат ишлаб чиқариш лойиҳасига 1,1 миллион АҚШ доллари миқдорида қўшимча кредит ажратилиб, 70 нафар ишсиз аёл доимий иш билан таъминланадиган бўлди.
Шунингдек, “Yashil Orol by Grand” МЧЖ томонидан барпо этилаётган, умумий қиймати 10 млрд сўмлик (шундан 5 млрд сўми банк кредити) соҳилбўйи экотуризм маскани лойиҳаси ўрганилди. Сентябр ойида ишга тушадиган ушбу масканда 40 та янги иш ўрни яратилади.
Полиэтилен қувурлар ишлаб чиқарувчи “Jahon savdo plast” МЧЖга эса 160 минг АҚШ доллари кредит ажратилиб, 15 нафар фуқаронинг бандлиги таъминланади. Бундан ташқари, корхонанинг ойлик электр энергияси харажати қарийб 45 млн сўмни ташкил этиши инобатга олиниб, 300 млн сўмлик кредит ҳисобига 100 кВт қувватли қуёш панеллари ўрнатилиши белгиланди. Бу ойига 30 млн сўм тежаш имконини беради.
“Ёшлар куни” муносабати билан Навоий шаҳридаги “Турон” маҳалласида ўтказилган учрашувда эса ёшларнинг таклиф ва муаммолари тингланди. Шунингдек, “Лойиҳалар офиси”га мурожаат қилган тадбиркорлар билан мулоқот ўтказилиб, мутахассислар кўмаги ҳамда сунъий интеллект имкониятлари орқали уларнинг ғоялари тайёр бизнес-лойиҳаларга айлантирилди.
