Фарғонада онлайн қиморга берилган шахс яширинча ҳамкасблари номига кредит олиб, уларни ҳам ютқазди

Гумондорга нисбатан Жиноят кодексининг 168-моддаси 3-қисми “д” ва “г” бандлари билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Фарғона вилоятида онлайн қиморга берилган шахс яширинча ҳамкасблари номига кредит олиб, уларни ҳам ютқазиб юборган. Бу ҳақда ИИВ ахборот хизмати хабар бермоқда.

Маълум қилинишича, Олтиариқ туманида яшовчи шахс онлайн қимор ўйинларига берилиб кетиб, бор пулларини ютқазади, қарзга ботади. Бироқ шунда ҳам қимор ўйнашни тўхтатмайди.

Шундан сўнг у фирибгарлик йўлига ўтади. Ҳамкасбларини алдаб, уларнинг номига кредит олади ва пулларни онлайн қиморда ютқазади.

“Менинг юртим” телеканалининг “Ҳудуд” дастурида берилган лавҳада айтилишича, бир неча нафар фуқарога кредит тўлови ҳақида хабарнома келган. Шундан сўнг улар ИИБга мурожаат қилган.

ИИБ томонидан олиб борилган суриштирувларда кредитни фуқароларнинг ҳамкасби, онлайн қимор ўйинларига берилиб қолган йигит олгани аниқланган. У 4 киши номига жами 75 млн сўм кредит расмийлаштирган.

Жабрланувчилардан бирининг айтишича, йигит уни “сизга телефон олиб бераман” деб расмга тушириб олган. Сўнг унинг номига кредит олган.

Қайд этилишича, гумонланувчи процессуал тарзда қўлга олинган. Унга нисбатан Жиноят кодексининг 168-моддаси (фирибгарлик) 3-қисми “д” ва “г” бандлари билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

#кредит #онлайн қимор #Фарғона