Ўзбекистонда биринчи рақамли электр станцияси қурилиши якунланди

Полшанинг Strefa Biznesu ва PAP электрон порталларида "Энергетика тизимини рақамлаштириш: Ўзбекистонда биринчи рақамли электр станцияси қурилиши муваффақиятли якунланди" сарлавҳали мақола эълон қилинди.

"Shanghai Electric компаниясининг Ўзбекистондаги биринчи рақамли қурилмаси бўлган 220 кВ кучланишли "Зафаробод" рақамли подстанциясининг қурилиши муваффақиятли якунланиб, фойдаланишга топширилди. Ушбу замонавий подстанция Жиззах вилоятида жойлашган бўлиб, қарийб 75 минг квадрат метр майдонни эгаллайди ва Ўзбекистон шарқида энергия таъминотини сезиларли даражада яхшилашга қаратилган", – деб таъкидланган нашрларда

Қайд этилишича, "Зафаробод" рақамли подстанцияси тўлиқ ишга тушгач, ҳудудий электр тармоқларини мустаҳкамлаш ва мамлакатда энергия тақсимотини яхшилашда муҳим рол ўйнайди. 400 мегаватт қувватга эга янги иншоот Жиззах вилоятини электр энергияси билан таъминлашни самарали икки баробарга оширади, яқин атрофдаги саноат корхоналари ва аҳоли турар жойларини барқарор энергия билан таъминлайди.

Подстанция Shanghai Electric компанияси томонидан ишлаб чиқилган 250 МВА қувватга эга иккита автотрансформатор билан жиҳозланган. Улар Жиззах вилоятини ишончли ва сифатли электр энергияси билан таъминлашни кафолатлайди, шунингдек, бу жадал ривожланаётган ҳудуднинг тобора ортиб бораётган талабини қондиради.

"Зафарободдаги энг муҳим ва инновацион сармоя концепцияси подстанциянинг самарадорлиги ва хавфсизлигини сезиларли даражада оширадиган тўлиқ рақамли тизимни жорий этиш ҳисобланади. Подстанция замонавий мониторинг ва маълумотларни йиғиш тизимлари билан ҳам жиҳозланган бўлиб, бу жойларда техник хизмат кўрсатувчи ходимларга бўлган эҳтиёжни камайтиради ва иш хавфсизлигини оширади", – деб ёзган Полша ОАВ.