Naked Science хабарига кўра, янги линия Шандун провинциясининг Янтай ва Вэйхай ҳудудларида ишлаб чиқариладиган электр энергиясини бошқа ҳудудларга етказишга мўлжалланган.
Линиянинг бир занжир ҳисобидаги эквивалент узунлиги 1197 километрни ташкил этади. У Янтай, Циндао, Жичжао, Вэйфан ва Лини шаҳарлари ҳудудидан ўтади.
Лойиҳа доирасида 1000 киловолт, яъни бир миллион волт кучланишли янги тақсимлаш подстанцияси қурилган ва шу тоифадаги иккита мавжуд подстанция кенгайтирилган.
Шунингдек, 2124 та электр узатиш таянчи ўрнатилган. Уларнинг 822 таси тепалик ва тоғли ҳудудларда, яна 17 таси эса денгиз акваториясида жойлашган.
Шандун Хитойнинг энг кўп энергия истеъмол қилувчи провинцияларидан бири ҳисобланади. 2026 йил сентябр ойи якунига келиб, бу ерда қазилма ёқилғилардан фойдаланмайдиган энергетика объектларининг ўрнатилган қуввати 147 миллион киловаттга етган. Шамол ва қуёш энергетикаси ҳиссасига 132 миллион киловатт — провинция электр станциялари умумий ўрнатилган қувватининг ярмидан кўпи тўғри келган.
Янтай — Вэйхай яриморолида Шандун атом энергетикасининг катта қисми жамланган. Ҳудуд электр энергиясини асосан ташқаридан қабул қилувчи минтақадан уни бошқа жойларга етказиб берувчи йирик марказга айланиб бормоқда.
Янги линия мавжуд тармоққа уланиб, «саккиз» рақамига ўхшаш иккита ҳалқадан иборат тизимни ҳосил қилган. Бу Хитойдаги шундай тузилишга эга биринчи минтақавий ўта юқори кучланишли тармоқ ҳисобланади.
Ҳалқалар бир-бири учун захира вазифасини бажариши мумкин. Бу электр узатиш имкониятини кенгайтириб, тизимда носозликлар юз берганда тармоқнинг барқарорлигини оширади.
Лойиҳа Хитойда бир вақтнинг ўзида тоғли ҳудуд ва денгиз акваторияси орқали қурилган биринчи ўта юқори кучланишли линия экани билан ҳам ажралиб туради. Фаол қурилиш даври 12 ойни ташкил этган — бу мамлакатдаги шу тоифа ва ўхшаш кўламдаги ўзгарувчан ток узатиш лойиҳалари учун энг қисқа муддат сифатида қайд этилган.
Хайян-Си тақсимлаш подстанцияси эса «бир майдонда иккита станция» тамойили асосида қурилган. Келгусида ундан 1000 киловольт кучланишли 12 та чиқувчи линия ташкил этиш режалаштирилган.
Корпорация маълумотига кўра, Хитойда ҳозиргача ўта юқори кучланишли электр узатиш бўйича 44 та лойиҳа ишга туширилган. Уларнинг 23 таси ўзгарувчан, 21 таси доимий токда ишлайди.
