Нигериялик уста картондан Lamborghini ясади

Нигериялик 18 ёшли Этсенумҳе Аҳмад картон ва ёғочдан Lamborghini Egoista’нинг тўлиқ нусхасини ясаб, ижтимоий тармоқларда шуҳрат қозонди. Иш учун икки йил кетган, аммо натижа кутилганидан ҳам аъло бўлди — унинг қўлбола суперкари нафақат чинакам Lamborghini’га ўхшайди, балки ўрнатилган двигател туфайли соатига 40 километр тезликда ҳаракатлана олади.

Аҳмаднинг картондан ясалган Lamborghini’да кўча айлангани акс этган видео интернетда миллионлаб кўрилди. Шарҳловчилар устанинг ижодкорлигидан ҳайратда қолди: баъзилари буни “даҳолик” деб аташса, бошқалари ҳазиллашиб, энди у машинани автоювиш шохобчасида ювиши кераклигини таъкидламоқда.

Аҳмад табиатан бундай нарсаларни яратиш қобилиятига эга эканини ва ҳеч қандай махсус таълим олмаганини айтди. У ўз лойиҳалари учун қайта ишланган материаллардан фойдаланиб, чиқиндиларни фойдали тузилмаларга айлантиради.

Аввалроқ Покистонда маҳаллий муҳандислар Tesla Cybertruck автомобилининг арзон нусхасини ясаган эди.

Унга қадар бразилиялик стоматолог Хосе Сикейра маҳаллий чиқиндихоналардан топган эҳтиёт қисмларидан Ferrari F40’нинг нусхасини йиғгани маълум бўлганди.