Бундесвер 2029 йилгача Starlink аналогини ишлаб чиқишни режалаштирмоқда

Германия Мудофаа вазирлиги ўзининг сунъий йўлдош тизимини ишлаб чиқмоқчи, у Илон Маскнинг Starlink'и аналогига айланади. Бу ҳақда 9 апрел, чоршанба куни Handelsblatt нашри манбаларга таяниб хабар берди, Бундесвер вакили ҳам режаларни тасдиқлади.

Газетанинг ёзишича, 2029 йилгача камида битта сунъий йўлдош туркуми – биргаликда аниқ вазифани бажарадиган бир неча юзлаб сунъий йўлдошлар тармоғини учириш режалаштирилган.

Ҳозирда Бундесвер ихтиёрида бироз камроқ шундай сунъий йўлдошлар мавжуд — бу самарали иш учун етарли эмас. Шунинг учун Германия узоқ йиллар давомида алоқа, сигналларни ўқиш ва таҳлил қилиш ҳамда Ерни кузатиш соҳаларида – биринчи навбатда, Қўшма Штатлардаги ҳамкорларга таянган, деб ёзади Handelsblatt.

Энди Германия сунъий йўлдошлар масаласида «шошилинч равишда» мустақил бўлишга интилмоқда, гарчи сентябр ойида, Handelsblatt таъкидлаганидек, бундай режалар Мудофаа вазирлигида муҳокама қилинмаган эди. Бунинг сабаблари орасида Маскнинг Украина учун Starlink'ни молиялашдан бош тортиши мумкинлиги, шунингдек, ЕИ 2030 йилгача ишлаб чиқмоқчи бўлаётган Iris2 сунъий йўлдошлар туркумидан ҳарбий мақсадларда фойдаланиш имконияти чеклангани бор.

Газетанинг уч манбасига кўра, Бундесвер Starlink аналогини ишлаб чиқиш бўйича буюртмани биринчи навбатда немис компанияларига топширмоқчи. Газетанинг тўрт манбасига кўра, вазирлик аллақачон Isar Aerospace, RFA ва Hyimpulse билан музокаралар олиб бормоқда. Шу билан бирга, Германия Европанинг бошқа давлатлари билан ҳамкорлик қилишга тайёр.

Ҳукмрон коалиция тузилганини эълон қилган ХДИ/ХСИ ва ГСДП ҳам ушбу секторни ривожлантириш муҳимлигини тушунади. Томонлар лойиҳа бошқа нарсалар қатори немис космик саноати компанияларини қўллаб-қувватлашига ишоняпти.