АҚШ Сенати Бош штаб бошлиғи лавозимига янги номзодни маъқуллади

Истеъфодаги генерал-лейтенант Жон Кейн АҚШ Штаб бошлиқлари бирлашган қўмитаси раҳбарига айланади.

Фото: REUTERS

АҚШ Сенати истеъфодаги генерал-лейтенант Жон Кейнни Штаб бошлиқлари бирлашган қўмитаси раҳбари лавозимига маъқуллади.

Қайд этилишича, Сенатда Кейн номзоди кўпчилик овоз билан қўллаб-қувватланган (60 та қарши 25 та, яна 15 таси бетараф).

АҚШ Штаб бошлиқлари бирлашган қўмитаси лавозими феврал ойида, Доналд Трамп кутилмаганда генерал Чарлз Браунни лавозимдан олганидан кейин бўшаб қолганди. Браун — мазкур лавозимни эгаллаган тарихдаги иккинчи афроамерикалик генерал ҳисобланади.

Чарлз Брауннинг лавозимдан олиниши президентнинг Қуролли кучларда хилма-хиллик ва тенгликни қўллаб-қувватловчи қўмондонлардан тозалаш кампанияси билан боғлиқ. Президент лавозимга киришган заҳоти Қуролли кучларда «хилма-хиллик, тенглик ва инклюзивлик» дастурларини тугатиш тўғрисидаги фармонни имзолаган эди.

Аввалроқ АҚШ Қуролли кучлари Киберқўмондонлиги ва Миллий хавфсизлик агентлиги раҳбари сифатида фаолият юритиб келган генерал Тимоти Хо лавозимдан олингани тўғрисида хабар берилганди.

#Доналд Трамп #Жон Кейн