Ереван Боку билан ЕХҲТ Минск гуруҳини тарқатиб юбориш шартини муҳокама қилмоқда

Арманистон ва Озарбойжон Европада хавфсизлик ва ҳамкорлик ташкилоти (ЕХҲТ)нинг Тоғли Қорабоғ можаросини тартибга солиш бўйича Минск гуруҳини тарқатиб юбориш шартларини фаол муҳокама қилмоқда, Арманистон бош вазири Никол Пашиняннинг матбуот котиби Назели Багдасарян.

«Минск гуруҳи механизмларини тарқатиб юбориш ва тинчлик битимини имзолаш масаласига келсак, бу Арманистон Республикаси учун аниқ кун тартиби ва ҳозирда бу қандай шароитларда амалга ошиши мумкинлиги ҳақида фаол муҳокамалар олиб борилмоқда», деди у "Арменпресс" агентлигига.

ЕХҲТнинг Минск гуруҳи 1992 йилда Тоғли Қорабоғ можаросини ҳал қилиш учун тузилган. Гуруҳнинг ҳамраислари Россия, АҚШ ва Франциядир. Шунингдек, Германия, Беларус, Италия, Туркия, Финландия, Швеция ҳамда Озарбойжон ва Арманистоннинг ўзи ҳам унга киради.

ЕХҲТ Минск гуруҳининг тарқатиб юборилиши Озарбойжоннинг Арманистон билан тинчлик шартномасини имзолаши учун иккита шартдан биридир. Пашинян апрел ойида парламентда нутқ сўзлаб, Бокуга бир вақтнинг ўзида тинчлик битимини ҳам, ЕХҲТ Минск гуруҳини тарқатиб юбориш ҳақидаги баёнотни ҳам имзолашни таклиф қилган эди. Унинг фаолияти 2022 йилдан бошлаб амалда тўхтатилди, чунки ҳамраислар ўзаро алоқаларини тўхтатди.