Азизлар, биз селектордаги скриншотлар ҳақида видео қилиб юрганимиздан ранжиган кўринади АҚШ президенти Трамп «яна трендга қайтиш учун» шов-шувли чиқиш қилди. Эсингизда бўлса, тунов куни Трамп Путинга 50 кун вақт берган, бу ҳақда қилган видеомизда кейинги муҳлат қанча вақтга бўларкин, дегандик. Буни қарангки, мистер Трамп бу гал муддатни чўзмади, қисқартирди. «Мен кўп кутолмайман, Путинда бугундан бошлаб ўн кун вақт бор», деди. Қуйида шу ҳақда гаплашамиз.
Трамп ва дедлайн
Биз иккинчи муддатини ўтаётган Доналд Трамп Украинадаги урушни тугатиш бўйича дедлайн белгилашига одатланиб қолдик. Аввалига у инаугурациядан чиқиб ҳали Овал кабинетга шакарсиз кола чақирадиган тугмани қайтаришдек «стратегик муҳим ишни» ҳам бир чеккага суриб, урушни тугатишга ваъда берганди. Кола чақирадиган тугма ва Уинстон Черчилнинг бюсти Овал кабинетга қайтди, лекин уруш тугагани йўқ.
Кейин янгидан янги дедлайнлар пайдо бўлди: уч кун, икки ҳафта, эллик кун. Вазият шунчаликка бордики, Трампнинг гапларини жиддий қабул қилмай қўйишди. Ваҳоланки, бу гапларни оддий шоумен эмас, дунёдаги энг қудратли, бутун бошли ядровий давлат етакчиси айтмоқда.
«Путин жавоб бермади, бу – шармандалик»
Оқ уй Трампнинг самолётда туриб Россия манзилига айтган гаплари аудиосини эълон қилди. «Бу Россияга таъсир қиладими-йўқми, билмайман, лекин тарифлар жорий этамиз. Путиндан ҳеч қандай жавоб олмадим, бу – шармандалик. Ҳафтасига беш минг одам ўлаётганини айтгандим, энди етти минг ўляпти. Одамлар бошига бомба тушмоқда, даҳшатли уруш», деди Трамп.
АҚШ президенти аввалроқ Россияга берган 50 кун муҳлат кўплиги, 10-12 кун ичида Москвадан сулҳ бўйича келишув кутишини айтганди. Журналистлар ундан мана шу гапини аниқлаштиришни сўради. Трамп эса ўша ернинг ўзида, йўл-йўлакай, чинакам импровизация билан жавоб берди: «Ten days from today» (Бугундан бошлаб ўн кун). Демак, Трампнинг ҳисоб-китоби бўйича 8 август куни, Россия – Гуржистон уруши бошланганининг 17 йиллигида Москва Киев билан сулҳ имзоламаса, Вашингтон чора кўришни бошлайди.
Чоралар катта эҳтимол иккиламчи санкциялар кўринишида бўлади. Яъни Россия нефтини сотиб оладиган давлатлар АҚШга олиб кирадиган маҳсулоти учун 100 фоиз бож тўлайди. Бу Хитой ва Ҳиндистон каби давлатларга таъсир қилиши мумкин.
Айтганча, Хитой америкалик мулозимларга тарифлар эълон қилинганидан кейин ҳам ўз хоҳиши бўйича иш кўришини билдирган. Яъни «Сиз нима қилсангиз қилаверинг, биз рус биродарларимиздан нефт олаверамиз», деган чинликлар. АҚШ молия вазири Скотт Бессентнинг айтишича, хитойликлар Россиядан нефт сотиб олиб, 100 фоиз божни тўлашга тайёр.
