Путин билан учрашув Трамп учун ён бериш эмас – Рубио

АҚШ давлат котиби Марко Рубио президент Доналд Трампнинг 15 август куни Аляскада Кремль раҳбари Владимир Путин билан учрашуви позицияларни аниқлашга уриниш эканини тушунтирди.

Рубионинг таъкидлашича, Оқ уй раҳбарининг Путин билан аввалги уч-тўрт телефон суҳбати кутилган натижани бермаган, шунинг учун Трамп Путин билан шахсан учрашиб, вазиятни «одамнинг кўзига қараб» баҳолашни зарур деб ҳисоблайди.

«Одамлар тушуниши керак - президент Трамп учун бу учрашув ён бериш эмас», деди Рубио.

Шунингдек, АҚШ давлат котиби матбуотда Трамп билан учрашув Путин учун ғалаба бўлгани ва шу тариқа у изоляциядан чиққани ҳақидаги баёнотларга ҳам муносабат билдирди.

«Йиғилиш - бу позицияларни аниқлаш ва қарор қабул қилиш учун қиладиган иш. Мен барча далилларга эга бўлишни истайман. Мен бу йигитнинг кўзига қарамоқчиман. Ва бу президент ҳам қилмоқчи бўлган нарса», деди АҚШ давлат котиби.

Рубионинг фикрича, улар учрашув давомида бу ёндашувнинг муваффақиятга эришиш имконияти бор-йўқлигини тезда тушуниб олишади.