Трамп Зеленскийга Путин билан учрашувда Украина ҳудудлари масаласини муҳокама қилмасликка ваъда берди

Доналд Трамп Украина президенти Владимир Зеленский ва Европа етакчилари билан суҳбат чоғида Аляскада Владимир Путин билан бўладиган учрашувда Украина ҳудудларини «тақсимлаш» масаласини муҳокама қилмаслигини айтди, деб ёзди CNN ва NBC News бир нечта манбаларга таяниб.

NBC News суҳбатдошларига кўра, Трамп ушбу учрашувдаги мақсадини «ўт очишни тўхтатиш» деб атаган. АҚШ президенти Европа етакчилари билан суҳбатда «ўт очишни тўхтатиш» тинчлик музокаралари бошланишидан олдин амалга оширилиши кераклигини тан олган.

Бироқ Европа давлатларининг баъзи раҳбарлари бу суҳбатдан кейин «Трамп Путин билан учрашуви натижаларига унчалик оптимизм билдирмаяпти, деган хулосага келган», деб ёзди NBC News. CNN манбасининг таъкидлашича, «бу учрашувдан кутилаётган натижалар юқори эмас».

6 август куни Путин Кремлда Трампнинг махсус вакили Стив Уиткофф билан учрашди. Ушбу учрашувда Россия президенти тинчлик келишувининг ўз шартларини баён қилди: Киев ўт очишни тўхтатиш ва ҳозирги позицияларда фронт чизиғини музлатиш эвазига Донбассдан воз кечади. Кейинроқ The Washington Post манбаси Путин Херсон ва Запорожие вилоятларининг Россия томонидан босиб олинган қисмларидан ҳам воз кечишга тайёр эмаслигини айтди.

Зеленский Европа етакчилари билан биргаликда Трамп билан суҳбатлашди. Суҳбатдан сўнг Франция президенти Эммануэл Макрон Трамп ҳудудий масалаларни фақат Украина иштирокида муҳокама қилишга ваъда берганини айтди.