Республикачилар Трамп ва Путин учрашувини эҳтиёткорона баҳолади, демократлар танқид қилди

Икки давлат раҳбарларининг Аляскадаги учрашуви турли мулоҳазаларга сабаб бўлди.

Фото: REUTERS

АҚШ Сенати ва Вакиллар палатасида, ОАВ хабарларига кўра, Қўшма Штатлар ва Россия президентлари Доналд Трамп ва Владимир Путиннинг бўлиб ўтган учрашуви натижалари турлича баҳоланди.

Республикачи сенатор Лиза Мурковски саммитга «эҳтиёткорона оптимизм билан» қарашини айтди.

«Мен маълум бир ютуқларга эришилганлиги ҳақидаги сигналларга эҳтиёткорона оптимизм билан қарайман. Шунингдек, иккала президент ҳам келажакдаги учрашувлар ҳақида гапирганини эшитиш қувонарли бўлди, умид қиламанки, уларда Украина ҳам бўлади», деб ёзди Мурковски ижтимоий тармоқда.

Унинг партиядаги ҳамкасби сенатор Кэти Бритт президентлар учрашуви натижаларини маъқуллаб, уни «тўғри йўналишдаги қадам» деб атади.

«Факт фактлигича қолмоқда, президент Трамп айни дамда дунёга керак бўлган етакчи ва ишончим комилки, у бу можарога барҳам бериш учун кечаю кундуз ишлашда давом этади», деб ёзди Бритт.

Сенатдаги демократик озчилик етакчиси Чак Шумер ижтимоий тармоқда Трампни «Украина ва иттифоқчиларни қўллаб-қувватлаш ўрнига, Путин билан елкама-елка тургани» учун қоралади.

Вакиллар палатаси аъзоси, демократ Грегори Микснинг айтишича, Трамп «Путинга босим ўтказиши», унинг ҳарбий машинасига қарши кескин санкциялар киритиши ва Украинага ўзини ҳимоя қилиш учун зарур воситаларни тақдим этиши керак эди.