«Ёшимни ҳисобга олсак – ўйнамасам керак». Месси ЖЧга боришга иккиланмоқда

Лионел Месси Аргентина миллий жамоасида сўнгги уй учрашувини ўтказган бўлиши мумкин. Жамоа 5 сентябрга ўтар кечаси Буэнос-Айресда ЖЧ-2026 саралаши доирасида Венесуэлани йирик ҳисобда (3:0) мағлуб этди. Ўйин якунланганидан кейин эса афсонавий футболчи жаҳон чемпионатига боришига кўзи етмаётганини айтиб интервю берди.

Уйдаги сўнгги саралаш ўйини

Аргентинадаги «Мас Монументале» стадионидаги ўйин саралаш босқичидаги сўнгги уй ўйини эди — ва бу Месси ўз ватанида мухлислар билан хайрлашиш учун имконият ҳисобланарди. Секторлардан бирида «Ҳаммаси учун ташаккур, сардор» деган ёзув осиғлиқ турарди. У чигалёзди машғулотларини бошлашдан олдин атрофни айланиб чиқди, болаларини бағрига босди ва трибуналарга қаради, у кўз ёшларини зўрға тийиб турарди.

Ўйиндан кейин форвард тан олди: «Бу ерда шундай тугатиш имкониятига эга бўлиш – бу мен доим орзу қилган нарса, ўз одамларим билан хайрлашиш имкониятига эга бўлиш». Бу ибора TyC Sports эфирида янгради.

Майдонда ҳам барчаси чиройли сценарийда кечди. Хулиан Алварес ўзи гол уриши мумкин бўлган ҳолатда сардорга пас узатди, у эса барчасини қиролларга хос тарзда бажарди – бир муддат пауза ушлади, кейин зарба йўлини тўсиш учун газонга ётган футболчилар ва дарвозабон устидан тўпни ошириб дарвозага йўллади, кейин эса иккинчи голни урган Лаутаро Мартинесга ассистентлик қилди, ўйин охирида дублни расмийлаштирди – 3:0. У иккинчи голини урганида терма жамоада саралаш ўйинларида урилган голлари сони бўйича (36) азалий рақобатчиси Криштиану Роналдуга етиб олди.

У шу куни ҳет-трик қилиши ҳам мумкин эди, аммо офсайд туфайли унинг учинчи голи бекор қилинди. Лекин барчаси шусиз ҳам чиройли ва жуда таъсирли чиқди – финал ҳуштагидан сўнг салют ва бутун мамлакатнинг кумири шарафига қўшиқлар янгради.

ЖЧ-2026 саралаши якунига яна бир тур қолган. Аммо Лео Эквадорга қарши сафар ўйинида қатнашмайди – жамоа муддатидан олдин йўлланма масаласини ҳал қилган.

Шу билан бирга, Венесуэлага қарши ўйин Мессининг миллий жамоадаги сўнгги ўйини бўлиб қолиши мумкин. У ЖЧ-2026 га боришига шубҳа билан қарашда давом этмоқда: «Мен жаҳон чемпионати ҳақида олдин ҳам гапиргандим: мен яна бир бор қатнашаман деб ўйламайман... Ёшимни ҳисобга оладиган бўлсак, мен у ерда ўйнамаслигим мантиқий. Аммо биз деярли мақсадга етдик, шунинг учун мен қаттиқ ҳаяжондаман ва ўйнашга иштиёқмандман.

Доимо айтганман, мен бунга кун сайин яқинлашаман. Барчаси ўзимни қандай ҳис қилишимга боғлиқ. Биринчи навбатда, ўзимга нисбатан ростгўй бўлишим лозим. Ўзимни яхши ҳис қилсам, бу менга ёқади, аммо бунинг акси бўлса, тўғрисини айтаман, мен бундан завқлана олмайман. Шу туфайли агар ўзимни ёмон ҳис қиладиган бўлсам, майдонга чиқмасликни афзал кўраман. Кўрамиз. Мен ҳали жаҳон чемпионати борасида бир қарорга келмадим. Ўйиндан ўйинга мавсум охирига қараб борамиз, кейин эса мавсумолди йиғинида қатнашаман ва яна ярим йил вақт қолади. Кўрамиз, ўзимни қандай ҳис қиларканман. Умид қиламанки, мен 2026 йилда мавсумолди йиғинини яхши ўтказаман ва МЛСда мавсумни яхши кайфиятда якунлайман, шундан кейин бир қарорга келаман».

Айтиш керакки, Мессидан бундай фикрлар олдин ҳам янграган. 2022 йилда у ишонч билан Қатардаги жаҳон чемпионати фаолиятидаги сўнггиси бўлиб қолишини айтиб, АҚШга бориш вариантини ўйлаб ҳам кўрамаганди. Энди эса унинг сўзлари ишончсиз кўринмоқда.

Оқшомдаги ҳиссиётлар ва сўзлар

Шу куни Аргентина миллий жамоаси бош мураббийи Лионел Скалони кўз ёшларини базўр тийиб ўтирди. Ўйиндан кейинги матбуот анжуманида эса журналистнинг шу ҳақдаги саволига жавоб қайтара олмади — залдагилар уни олқишлашди.

«Ҳа, Лео айтганидек, бу ўйин ҳиссиётларга бой, ўзига хос ва ёқимли бўлади – ахир бу чиндан ҳам Аргентинадаги ЖЧ-2026 саралаш босқичидаги сўнгги беллашувимиз. Биз ҳар доим айтганимиздек, ундан завқ олишимиз керак», – дея қайд этди Скалони.

Венесуэла билан ўйиндаги дубл Месси учун миллий жамоа сафидаги 194 ўйинда урилган 113- ва 114-голлар бўлди – бу Аргентина учун рекорд кўрсаткич. У жамоа билан 2022 йилда жаҳон чемпиони бўлди, икки бор Америка Кубоги ғолибига айланди (2021, 2024), 2022 йилги Финалиссима ва 2008 йилги Олимпиадада ғолиблигини қўлга киритган. «Монументал» стадиони уни саралашдаги муҳим голларига ҳам гувоҳ бўлган: масалан, 2021 йил октябрида Уругвай ва 2017 йил мартида Чили дарвозасига урган ғалаба голларини.

У терма жамоадан кетишини ҳали эълон қилмаган бўлса-да, бу оқшом мухлислар Леонинг Аргентинадаги сўнгги ўйинига гувоҳ бўлишди.