Лионел Месси Аргентина миллий жамоаси билан хайрлашди. 7 октябрга ўтар кечаси 39 ёшли форвард Бенинга қарши (3:0) миллий жамоа сафидаги сўнгги ўйинини ўтказди. 10-дақиқада (футболчи бутун фаолияти давомида шу рақамли футболкада тўп сурган) ўйин қисқа вақтга тўхтатилди – футболчилар уни ўринларидан туриб олқишлашди, майдондаги футболчилар унинг олдига келиб қўлини сиқиб қўйишди.
Ўйиндан кейин эса ҳужумчи «Монументал» стадионида йиғилган мухлислар қаршисида 10 дақиқа чўзилган ҳаяжонли нутқ сўзлади.
«Кетгим келмаяпти»
Қуйида унинг нутқи матни тўлиқ келтирилади.
«Бугун нимадир дейиш жуда қийин. Ҳиссиётлар жўш урмоқда, бошимда минг хил фикр кезиб юрибди. Албатта, илкис хаёлимга келгани – отам. Олдинроқ хайрлашув мактубимда айтганимдек, фақат миннатдорчилик билдира оламан. 20 йилдан ортиқ вақт мобайнида бу футболкани кийиб юриш мен учун катта фахр эди. Бошимиздан ўтган энг оғир дамларда ҳам курашишдан, жанг қилишдан, боримни беришдан ҳеч қачон тўхтамадим ва доимо шу ерда бўлишни хоҳладим. Бу ерга бошқа қайтмаслигимни англаш менга жуда қаттиқ азоб беради.
Онт ичаманки, бир умрга бу ерда қолишни истардим. Аргентина миллий жамоаси сафида ўйнаш – сен билан содир бўлиши мумкин бўлган энг гўзал нарсадир. Юқорида айтганимдек, бутун умр шу ерда бўлишни истардим, лекин вақти келди. Охирги жаҳон чемпионати – мен бошдан кечирган нарсаларнинг барчаси улкан синов бўлди. Ўзимнинг ва бутун мамлакатнинг орзусини рўёбга чиқариш – яна жаҳон чемпиони бўлиш бахтига муяссар бўлдик.
Охирги жаҳон чемпионатида биз жуда яқин эдик ва тўғрисини айтсам, одамлар айтганидек, ҳеч қандай ғайриоддий нарса содир бўлмади. Англия билан ўйин биздан жуда кўп кучни – ҳам жисмоний, ҳам ҳиссий кучни тортиб олганди. Жуда катта энергия сарфланганди. Кейинги босқичга қийналиб чиқдик. Аммо ғалаба учун курашдик, бу футболкани кийганда доим шундай бўлган.
Бу йўлни бирга босиб ўтган барча ҳамроҳларим билан – нафақат биргаликда чемпионлик таъмини тотган, балки унгача бўлган шерикларим билан ҳам чемпион бўлишга жуда яқин келгандик. Ҳеч қачон шубҳа қилманг: мен билан бирга ўйнаганларнинг барчаси доим бу футболка учун борини беришган. Ҳар доим.
Барча шерикларимга биргаликда ўтган лаҳзалар учун миннатдорчилик билдираман. Улар жуда кўп. Улар менга болалик орзуларим – жаҳон чемпиони бўлиш, Америка кубогини ва Финалиссимани ютишда ёрдам беришди.
