Япония бош вазири истеъфога чиқмоқда

Журналистларнинг ёзишича, Исибанинг қарори ҳукмрон Либерал-демократик партияда бўлинишга йўл қўймаслик истаги билан боғлиқ.

Бош вазир якшанба куни бўлиб ўтган матбуот анжуманида Япония АҚШ президенти Доналд Трамп маъмурияти билан музокараларни муваффақиятли якунлаганидан сўнг кетаётганини айтди.

Ёзда Трамп Токиога босим ўтказиб, уни 1 августгача савдо битими тузишга кўндирди, унинг энг йирик экспорт бозорида 25 фоизлик божлар жорий этиш билан таҳдид қилди.

Исибанинг таъкидлашича, у Япония-Америка савдосини тартибга солишни ўзининг асосий вазифаси деб билган ва ўтган ҳафта Вашингтон билан ўзаро англашув меморандуми имзоланганидан кейин у кетиши мумкин.

«Мен доимо ўз лавозимимда қолишга уринмаётганимни ва тегишли вақтда қарор қабул қилишимни айтганман – деди бош вазир журналистларга. – Энди, Америка тарифлари бўйича музокаралар масаласи ҳал қилинганидан сўнг, айнан шу вақт келди, деб ҳисоблайман. Шунинг учун кетишга ва янги авлодга йўл беришга қарор қилдим».

Июл ойида бўлиб ўтган сайловлардан сўнг Исиба бошчилигидаги коалиция Япония парламентининг юқори палатасида кўпчиликни йўқотганди. Бу партиянинг 70 йиллик тарихида илк бор рўй берганди.

Asahi Shimbun газетаси ёзишича, кўплаб япон сиёсатчилари Исибани лавозимидан кетишга чақирган.

Исиба 2024 йил октябрида Япония бош вазири бўлганди: у аввалги ҳукумат раҳбари Фумио Кисида қайта сайланиш ниятидан воз кечганидан кейин партия ичидаги сайловларда ғалаба қозонганди.

У Японияда инфляцияга қарши курашишга, шунингдек, Либерал-демократик партияни ислоҳ қилишга ваъда бериб, ҳукумат раҳбари лавозимига киришган эди. Бироқ, кўп ўтмай, партия маблағ йиғиш билан боғлиқ бир қатор можароларга аралашиб қолди, дея таъкидлайди NHK.

Жорий йил июл ойида Япония парламенти юқори палатасининг бир қисмига бўлиб ўтган сайловларда 248 ўриннинг ярми овозга қўйилган, бироқ ҳукмрон коалиция атиги 47 мандатга эга бўлган.

Шу тариқа, Либерал-демократик партия юқори палатада кўпчиликни йўқотди, бироқ Исиба истеъфога чиқишни режалаштирмаётганини маълум қилганди.

Ўтган йилги парламент қуйи палатасига сайловларда коалиция кўпчилик ўринни қўлга кирита олмаганидан сўнг, ЛДП иш ҳақи турғунлиги ва инфляция барқарор ўсишидан норози бўлган сайловчиларнинг ишончини қайта тиклай олмади.

Ўнг марказчи Либерал-демократик партия гарчи раҳбарлари тез-тез ўзгариб турса ҳам 1955 йилдан бери Японияни деярли узлуксиз бошқариб келмоқда.