Тошкентда 6 мингдан ортиқ йўловчи автобусда чиптасиз ҳаракатлангани учун жазоланди

Қонунбузарлар 41 минг 200 сўм миқдорида жаримага тортилди.

Фото: Видеодан кадр

Тошкент шаҳрида йил бошидан бери 6 мингдан ортиқ йўловчи автобусда йўл ҳақини тўламагани учун жазоланди, деб хабар берди Транспорт вазирлиги.

Қайд қилинишича, Транспорт назорати инспекцияси ҳамда Тошкент шаҳар жамоат транспортини мониторинг ва назорат қилиш давлат муассасаси томонидан пойтахт автобусларида йўл ҳақини тўламасдан ҳаракатланаётган йўловчиларга нисбатан кучайтирилган рейд тадбирлари ўтказилмоқда.

Хабарга кўра, жорий йилнинг ўтган даврида 6182 нафар қоидабузарга нисбатан маъмурий чора кўрилган.

Маъмурий жавобгарлик тўғрисидаги кодекснинг 144-моддаси 5-бандига асосан, йўловчининг шаҳар ичида ва шаҳар атрофига қатнайдиган автобусда чиптасиз юриши базавий ҳисоблаш миқдорининг ўндан бир қисми (41 минг 200 сўм) миқдорида жарима солишга сабаб бўлади.

Тайёрлаган: Сардор Юсупов

#Тошкент #жарима #жамоат транспорти