Қурилиш вазирлиги қурилишга рухсат олишда “ассалому алайкум”сиз иш битмайди, деган қурувчи устидан ИИВга ариза киритди

Қурилиш вазирлиги тадбиркор Усмонжон Абдусаматовга жавобгарлик чоралари қўллашни сўраб ИИВга ариза киритди. Бу ҳақда вазирлик ахборот хизмати хабар берди.

29 август куни қурилиш соҳаси тадбиркорлари билан ўтказилган очиқ мулоқотда тадбиркор Усмонжон Абдусаматов Тошкентда қурилиш учун рухсатномалар ва кадастр ҳужжатларини олиш билан боғлиқ коррупциявий “харажатлар” битта уй учун 200 минг долларгача етиши мумкинлигини билдирган. Қурилиш вазирлиги тадбиркор бу даъвоси билан жамоатчилик орасида асоссиз ахборот тарқалишига сабабчи бўлганини маълум қилган.

“Мазкур маълумотлар ижтимоий тармоқларда турли муҳокамаларни келтириб чиқарди. Натижада қурилиш соҳасида республика миқёсида олиб борилаётган ислоҳотларга, соҳа вакиллари ҳамда Қурилиш ва уй-жой коммунал хўжалиги вазирлигига нисбатан салбий муносабат шаклланмоқда. Бу эса ўз навбатида вазирлик ва унинг тизимида фаолият юритаётган ходимларнинг шаъни, қадр-қиммати ва ишчанлик обрўсига путур етказмоқда.

Шу боис Қурилиш ва уй-жой коммунал хўжалиги вазирлиги фуқаро (тадбиркор) Усмонжон Абдусаматовга нисбатан тегишли тартибда жавобгарлик чоралари қўлланишини сўраб, Ички ишлар вазирлигига расмий ариза киритганини маълум қилади”, дейилади хабарда.

Вазирлик қурилиш соҳасига оид барча давлат хизматлари ва тўловлар белгиланган тартибда фақат электрон тарзда амалга оширилишини, жараёнда қўшимча маблағ талаб қилиниши мутлақо тақиқланганини маълум қилди. Шунингдек, жисмоний ва юридик шахслар шаҳарсозлик ҳужжатларини олиш учун аризаларни фақат Ягона интерактив давлат хизматлари портали (my.gov.uz) ёки Давлат хизматлари марказлари орқали юборишлари мумкинлиги айтилган.

“Аризаларни кўриб чиқишда фуқаро ва ваколатли орган вакили ўртасида тўғридан тўғри мулоқотга йўл қўйилмайди. Хусусан, объект қурилишига оид рухсатнома олишдан тортиб, уни фойдаланишга қабул қилишгача бўлган барча жараёнлар “Шаффоф қурилиш” миллий ахборот тизими орқали тўлиқ назорат қилинади. Бу жараёнлар Вазирлар Маҳкамасининг 2022 йил 20 апрелдаги 200-сон қарори билан тасдиқланган маъмурий регламентлар асосида аниқ тартибга солинган”, дея маълум қилган Қурилиш вазирлиги.

Тадбиркор Усмонжон Абдусаматов ўз чиқишида Тошкентда қурилиш учун рухсатномалар ва кадастр ҳужжатларини олиш билан боғлиқ коррупциявий “харажатлар” ҳақида гапирганди.

“Ерни сотиб олдик. Ана энди рухсатнома олиш керак. Рухсатномага “заявка” ташлаяпмиз – “отказ”. “Заявка” ташлаяпмиз – “отказ”. Токи ҳалиги манзилига бориб, “ассалому алайкум” бўлмагунча (тадбиркор қўли билан пул санаш ишорасини қилади – таҳр.). Тўғри гапни гапиришимиз керак. Бу тўғридан тўғри эртанги харажатимизга таъсир қиляпти. Мисол учун, битта уйни 500 минг долларга кўтараётган бўлсак, кимгадир 50 минг, кимгадир 100 минг, кимгадир 20 минг бўлиб, у ўша жойга миниб қоляпти”, деганди тадбиркор.

Тадбиркор Тошкентда рухсатномалар олиш ва кадастр реестридан ўтиш билан боғлиқ қўшимча харажатлар ҳар бир уй учун 200 минг доллар, Тошкент вилоятида эса 100 минг долларгача етиши мумкинлигини даъво қилган ҳамда мутасаддилардан аризаларнинг асоссиз рад этилишига қарши чора кўришни сўраган.