Лукашенко яна Россиядан Беларусда иккинчи АЭСни қуришни сўради

Бир неча йиллардан бери Россиядан Беларусда иккинчи атом электр станциясини қуришни сўраб келаётган Александр Лукашенко яна Украинанинг босиб олинган ҳудудларини энергия билан таъминлаш учун ундан фойдаланишни таклиф қилди.

Фото: Natalia Fedosenko/ITAR-TASS/imago images

Беларус президенти Александр Лукашенко Россия президенти Владимир Путинга Украинанинг Россия томонидан босиб олинган ҳудудларини электр энергияси билан таъминлаш учун Беларусда яна бир атом электр станцияси (АЭС) қуришни таклиф қилди. Учрашув стенограммаси 26 сентябр, жума куни Кремл сайтида чоп этилди.

Лукашенконинг сўзларига кўра, бу АЭС шарқий Беларусда қурилиши мумкин. У Украинанинг Россия ўзиники деб ҳисоблаган Херсон, Запорижжия, Луханск ва Донецк вилоятларига электр энергияси етказиб беришни ўз мақсадларидан бири деб атади.

"Росатом" атом энергетикаси соҳасини янада кенгайтириш имкониятларини аллақачон ишлаб чиққан. Мен бу ерда молиявий масалаларни омма олдида муҳокама қилишни истамайман. Бизда вариантлар бор, улар ҳақида айтиб бераман, агар қарор қабул қилинса, зарурат туғилса, дарҳол янги энергия блоки ёки янги станция қуришни бошлаймиз", — деди Лукашенко.

Путин бу таклифни тўғридан тўғри қўллаб-қувватламади ва фақат «молиялаштириш умуман муаммо эмас», деб тушунтирди. «Агар электр энергиясини олиб, керакли тарифни тўлайдиган истеъмолчи бўлса, бу умуман муаммо эмас», деди Россия президенти.