АҚШ ғазнаси президент Доналд Трамп тасвири туширилган 1 долларлик коллекцион тангалар чиқариш имкониятини кўриб чиқмоқда.
Лойиҳага кўра, тангада АҚШ етакчиси Америка байроғи фонида қўлини мушт қилиб кўтариб турган ҳолатда тасвирланади. Бу тасвир 2024 йилда унга суиқасд қилингандан сўнг олинган фотосуратга шама қилади. Ғазна вакили якуний дизайн ҳозирча тасдиқланмаганини билдирди.
Оқ уй матбуот котиби Кэролайн Ливитт бу хабарга изоҳ бераркан, "Трамп буни (хабарни) кўрган-кўрмаганини билмайман, лекин бу унга ёқишига ишончим комил", деди.
АҚШда эсдалик тангалари зарб этиш анъанага айланган. 1986 йилда Озодлик ҳайкалига атаб чиқарилган ва қарийб 15,5 млн дона сотилган танга мамлакатдаги энг оммабоп танга ҳисобланади. Шунингдек, Жорж Вашингтоннинг 250 йиллиги, 1984 йилда Лос-Анжелесда ўтказилган ёзги Олимпиада ўйинлари ва АҚШ конституциясининг 200 йиллигига атаб чиқарилган тангалар ҳам яхши сотилган.
