«Илк жиддий чақириқ» –​​​​​​​ хориж матбуоти Каннаваронинг Ўзбекистонга келиши ҳақида

Италия сафида 2006 йилги мундиал чемпиони бўлган Фабио Каннаваро орадан 20 йил ўтиб мураббий сифатида жаҳон чемпионатида иштирок этади. Италиялик мутахассиснинг Ўзбекистон миллий жамоасига бош мураббий этиб тайинланиши чет эл матбуотида қандай кутиб олинди? Kun.uz бу борадаги муносабатларни бир саҳифага жамлади.

{Yii::t(}

Ўтказиб юбориш 6s

Ўтказиб юбориш

Ўз вақтида Италия миллий жамоасида Каннаваро билан елкама-елка тўп тепган, ҳозирда эса ушбу жамоани бошқараётган Женнаро Гаттузо ушбу тайинлов ҳақида ўз услубида ҳазил қилди.

«Мен Каннаварога қўнғироқ қилдим: Бу нимаси энди? Атир сепдинг, сочингни гелладинг ва жаҳон чемпионатига кетяпсан. Мен эса бу ерда йўлланма учун курашиб ётибман», – деган собиқ футболчи. 

ФИФА президенти Жанни Инфантино ушбу тайинловга биринчилардан бўлиб реакция билдирди. Футбол амалдори Каннаварони мундиалда иштирок этиши билан қутлади. Шу билан бирга, Инфантино Каннаваронинг Италия сардори сифатида 20 йил аввал мазкур мусобақа бош совринини кўтаргани, энди Ўзбекистон миллий жамоаси бош мураббийи сифатида мундиалда иштирок этишини алоҳида қайд этди.

Яқин ўтмишнинг энг таниқли мураббийларидан бири, италиялик таниқли мутахассис Фабио Капелло эса «Каннаваронинг тайинланиши – жуда яхши танлов» бўлганини билдирди. 

«У жуда катта тажрибага эга ва аниқ Ўзбекистон миллий жамоасига ёрдами тегади», – дейди Италия миллий жамоаси собиқ бош мураббийи.

Испаниянинг машҳур AS нашри журналисти Алехандро Сато ушбу тайинлов ҳақида ёзаркан, «Каннаваро мураббий сифатида илк жиддий чақириққа дуч келгани»ни таъкидлаган. У италиялик мутахассиснинг олдида ривожланиш босқичидаги жамоадан рақобатбардош лойиҳа яратишдек қизиқарли, айни пайтда жуда мураккаб вазифа турганини қайд этди.

Американинг FoxSports нашри Каннаваро тайинлови ҳақида эълон қилган мақолада «бу ўзбек футболи тарихида янги саҳифа очилиши» экани келтирилган.

Шу билан бирга, испаниялик футбол шарҳловчиси, журналист Хосе Давид Лопес Каннаваронинг тайинланиши «катта хато» бўлгани ҳақида ёзди. 

Таниқли футбол карикатурачиси Омар Мўманий ҳали Каннаваро тайинланмасидан туриб, ушбу воқеага ҳам ўз услубида муносабат билдириб улгурганди. У Каннаваронинг Ўзбекистон бош мураббийи бўлишидан ҳаммадан ҳам кўпроқ Абдуқодир Ҳусановнинг хурсанд бўлишини ёзганди. Бу билан у Каннаваро ҳам Ҳусанов каби марказий ҳимоя чизиғида тўп тепганига ишора қилган.

Таъкидлаш жоиз, тармоқларнинг инглиззабон сегментида «Манчестер Сити» мухлислари Каннаваронинг Ўзбекистон миллий жамоасига бош мураббий бўлганидан хурсанд эканини яшириб ўтирмаяпти. «Шаҳарликлар» мухлислари Абдуқодир Ҳусановнинг Каннавародан кўп нарса ўрганишига ишонч билдирмоқда.

Эслатиб ўтамиз, Ўзбекистон футбол ассоциацияси миллий жамоанинг янги бош мураббийи билан 2+3 схемасида, яъни кейинроқ 3 йилга узайтириш имконияти билан 2 йиллик шартнома тузган. Унга мураббийлар штабида ватандошлари – Ауженио Албараелла, Троизе Францеско ва Антонио Клименти ёрдам беради.

Маълумот учун, Каннаваро футболчи сифатида Италиянинг қатор клубларида, хусусан, «Наполи», «Интер» ва «Ювентус»да тўп сурган, 2006–2009 йилларда Мадриднинг «Реал» клуби аъзоси бўлган. У 2006 йилги жаҳон чемпионатида Италия миллий жамоаси билан ғолиб чиққан, ўша мавсум якунида «Олтин тўп» мукофотини қўлга киритган. У ҳозиргача ушбу мукофотга эга чиққан ягона ҳимоячи бўлиб қолмоқда.

Аммо унинг мураббийлик фаолияти у қадар ёрқин кечмаган. Унинг дастлабки иш жойи Хитойнинг «Гуанчжоу Эвергранд» клуби бўлган (2014-2015), кейинроқ Саудия Арабистонининг «Ан-Наср» (2015-2016), Хитойнинг «Тянцзин» (2016-2017), «Гуанжчоу» (2017-2021) клубларида ишлаган, 2019 йилда бир муддат Хитой миллий жамоасини бошқарган, сўнгра Италиянинг «Беневенто» (2022-2023) ҳамда «Удинизе» (2024) клубларида фаолият юритган. Сўнгги иш жойи Хорватиянинг «Динамо» Загреб клуби бўлиб турганди. У 2024 йил декабрида ушбу жамоа бош мураббийи этиб тайинланган, аммо 2025 йил апрелида қониқарсиз натижалар туфайли истеъфога чиқарилган эди.