«Дунё» ахборот агентлиги хабарига кўра, Ўзбекистон дипломатлари билан учрашувда Famot, Delta, Modern Farming, SOBEK, Fruits ва Pureland компаниялари вакиллари қатнашган.
Музокараларда қишлоқ хўжалиги, чорвачилик, суғориш ҳамда янги ерларни ўзлаштириш соҳаларидаги ҳамкорлик истиқболлари кўриб чиқилган.
Миср томони айлана суғориш тизимлари — пивотларни жорий этиш, чорвачилик учун озуқа базасини яратиш ва қишлоқ хўжалиги маҳсулотларини етиштириш бўйича қўшма лойиҳаларни ишлаб чиқишга тайёрлигини билдирган. Етиштирилган маҳсулотларни кейинчалик экспорт қилишни ташкил этиш масаласи ҳам муҳокама қилинган.
Компаниялар Ўзбекистон ҳудудларида янги ерларни ўзлаштириш ва қишлоқ хўжалигини ривожлантириш лойиҳаларида иштирок этиш истагини қайд этган.
Учрашув якунида ҳамкорлик имкониятларини жойида ўрганиш ва аниқ лойиҳаларни тайёрлаш мақсадида Миср мутахассисларининг Ўзбекистонга ташрифини ташкил этиш бўйича келишувга эришилган.
