17 октябр кунги оммавий намойишлар тартибсизликлар, ўт қўйиш ва дўконларни талон-торож қилиш билан якунланганидан сўнг вазият назоратдан чиқиб кетганини тан олган мамлакат ички ишлар вазири Лоран Нунес истеъфога чиқишга уринди. Бироқ президент унинг истеъфосини қабул қилмади. Аксинча, вазирга Франция шаҳарлари кўчаларида хавфсизликни кучайтириш ва тартибсизликлар айбдорларини жавобгарликка тортиш чораларини ишлаб чиқишни топширди.
Франция бош вазири Себастен Лекорню душанба куни мамлакатнинг айрим ҳудудларида мэрларга зарурат туғилганда қисман комендантлик соати жорий этиш ваколатини берганини маълум қилди.
Кечга бориб, бир нечта шаҳарда ҳокимият вакиллари ушбу ваколатдан фойдалангани маълум бўлди. Парижда Республика майдони ва Les Halles савдо маркази ҳамда йирик транспорт тугунига туташ кўчаларда маҳаллий вақт билан соат 23:00 дан 06:00 гача барча ёшдагилар учун комендантлик соати эълон қилинди.
Лион марказида соат 22:00 дан 06:00 гача намойишлар ва оммавий юришлар тақиқланди. Лилл ва Ницца шаҳарлари марказларида эса вояга етмаганларнинг кўчага чиқиши тақиқланди.
Лекорнюнинг сўзларига кўра, ҳудудий ҳокимият вакиллари тартибсизликлар вақтида полиция ўз ишини қандай ташкил этгани ҳақида саволлар қўймоқда. Улар вазият нима сабабдан назоратдан чиқиб кетганини билмоқчи.
Бош вазирнинг қўшимча қилишича, ўтган дам олиш кунларидаги тартибсизликлар вақтида қўлга олинганларнинг 80 фоизига нисбатан жиноий айбловлар қўйилади. У кўчалардаги тартибсизликларда «ўта сўл радикаллар»ни айблади.
Унинг айтишича, ҳукумат зарар кўрган ҳудудларни тиклаш учун маблағ ажратади ва бу харажатлар тартибсизликларни келтириб чиқарганлар зиммасига юклатилади.
«Мулкка зарар етказган шахслар молиявий жавобгарликка тортилишини таъминлайдиган қонун қабул қилинади», — деди Лекорню.
Бундан ташқари, бош вазир тартибсизликлар ва талон-торожликлар туфайли ўз вазифаларини бажара олмаётган ходимларни қўллаб-қувватлаш учун жамғарма ташкил этилишини эълон қилди.
Якшанба куни президент Эмманюэл Макрон халққа телемурожаат билан чиқиб, миллий бирликка чақирди ва Франция жамоатчилигини зўравонлик ҳаракатларини содир этганлар жазоланишига ишонтиришга уринди.
Бироқ Франция оммавий ахборот воситалари уни аниқ тафсилотлар йўқлиги учун танқид қилди. Макрон вандализм ҳаракатларини содир этганлар қандай жавобгарликка тортилиши, жабр кўрган компанияларга етказилган зарар қандай қопланиши, янги тартибсизликлар вақтида шаҳарлар хавфсизлиги қандай таъминланиши, таълим муаммолари юзасидан талабалар ва ўқитувчилар вакиллари билан мулоқот қачон йўлга қўйилишига аниқлик киритмади - зеро ўтган ойда намойишлар айнан шу муаммолар сабаб бошланганди.
