Қўшимча функционаллар
-
Тунги кўриниш
Венгрия Россиядан ЕИга СТГ етказиш тақиқланишини қўллаб-қувватлади
Венгриянинг Россиянинг СТГ бўйича позициясини ўзгартириши Россияга қарши янги санкциялар пакетига йўл очади. Словакия ва Австрия янги санкциялар пакетининг асосий мухолифлари бўлиб қолмоқда.
Венгрия Европа Иттифоқи томонидан Россияга қарши тайёрланаётган янги санкциялар пакети доирасида Россиянинг суюлтирилган гази (СТГ)ни ЕИга етказиб беришни тақиқлашни қўллаб-қувватлади, деб хабар берди EUobserver 9 октябр, пайшанба куни дипломатик манбаларга таяниб.
Венгрия аввалроқ санкциялардан ўзи учун истиснолар берилишига эришишга уринган эди, бироқ 8 октябр куни кечқурун ЕИ элчиларининг учрашувида Будапешт вакили «ҳеч қандай эътироз билдирмади». 19-санкция пакетини келишиш йўлидаги асосий тўсиқлар Словакия ва Австрия позициялари бўлиб қолмоқда.
Австрия расмийларининг таъкидлашича, санкциялар пакети Россия активларидаги икки миллиард еврони музлатиш тўғрисидаги бандни ўз ичига олади. Ушбу маблағларни Россия судининг қарорига биноан тўланган жаримани қоплаш сифатида Raiffeisen Bank International'га ўтказиш таклиф қилинмоқда.
Словакия вакили Братислава янги чекловларга қарши эканини таъкидлаб, Европа Иттифоқининг иқлимни муҳофаза қилиш сиёсати Словакия автомобил саноати учун зарарли эканлигини таъкидлади.
Аввалроқ Словакия Европа Иттифоқининг 2035 йилгача ички ёнув двигателларини тақиқлаш ташаббусига ҳам қарши чиққани хабар қилинганди.
