Берлиндаги Россия элчихонаси ёнида пичоқ билан қуролланган аёл ушланди

Аёл Россия элчихонасини қўриқлаётган Берлин полициячисини пичоқ билан қўрқитиб, ҳақорат қилган. Гумонланувчи қўлга олиниб, шифохонага етказилган. Терговни Берлин полициясининг Давлат хавфсизлик бошқармаси олиб бормоқда.

Фото: Vyacheslav Filippov/TASS/imago images

Берлин марказидаги Россия элчихонаси яқинида элчихонани қўриқлаётган полициячига пичоқ билан таҳдид қилган 31 ёшли аёл қўлга олинди. Берлин полицияси 12 октябр, якшанба куни маълум қилишича, аёл ксенофобик ҳақоратларни ҳам бақирган.

Полиция маълумотларига кўра, 11 октябр, шанба куни тушда гумонланувчи қўриқчига яқинлашиб, унинг юзига пичоқ тутган ва ҳақоратлай бошлаган. Қўриқчи хизмат қуролини чиқарганидан сўнг, аёл воқеа жойидан қочиб кетган, аммо тез орада полиция томонидан қўлга олинган.

«Ғайритабиий хатти-ҳаракатлар» туфайли у касалхонага ётқизилган ва у ерда турли моддалар бўйича қон текшируви ўтказилган. Ҳодиса Берлин жиноят полицияси бошқармасининг Давлат хавфсизлик бошқармаси томонидан тергов қилинмоқда.

Ҳақоратларнинг моҳияти шундан иборат эдики, қўриқчи, гумонланувчининг фикрича, Россия фуқароси бўлган, деб хабар берди n-tv полицияга таяниб. Полициянинг аниқлик киритишича, таҳдидлар Берлин полициясининг дипломатик ваколатхоналар ва бошқа муҳим биноларни қўриқлаш бўлими – Объектларни муҳофаза қилиш бошқармаси (Objektschutz) ходимига қаратилган.

Тайёрлаган: Отабек Матназаров

#Россия #Берлин