Тошкент шаҳридаги Халқаро Вестминстер университети жамоат саломатлиги соҳасидаги илғор тажрибалар маркази деб эълон қилинди

Тошкент шаҳридаги Халқаро Вестминстер университети (ТХВУ) Марказий Осиё минтақавий иқтисодий ҳамкорлик дастури (CAREC) доирасида Жамоат Саломатлиги соҳасидаги бешта илғор тажриба глобал марказларидан бири сифатида нуфузли мақомга эга бўлди.

Мазкур мақом Ўзбекистонда ҳам, бутун минтақада ҳам ТХВУнинг соғлиқни сақлаш тизимларини ривожлантириш, мутахассислар тайёрлаш, илмий салоҳиятни ошириш ва етакчиликни намоён этишдаги юқори даражасини тасдиқлади.

Жамоат саломатлиги соҳасидаги илғор тажрибалар глобал маркази мақомининг берилиши минтақа учун алоҳида аҳамиятга эга. Бундай мақом таълим муассасасининг халқаро стандартларга мос, илмий салоҳиятга эга ҳамда тиббиёт ва жамоат саломатлиги соҳасидаги замонавий ва узоқ муддатли муаммоларга жавоб бера оладиган мутахассисларни тайёрлашга қодир бўлган соғлиқни сақлаш тизими келажагини шакллантиришда асосий иштирокчилардан бири сифатида эътироф этилганини тасдиқлайди. Тошкент шаҳридаги Халқаро Вестминстер университетининг айнан шундай олий таълим муассасаси сифатида эътироф этилиши унинг Ўзбекистон ва бутун Марказий Осиёда кадрлар ҳамда илмий салоҳиятни ривожлантиришда етакчи ўрин тутаётганидан далолат беради.

- Бу эътироф нафақат университетимиз, балки бутун мамлакатимиз ва минтақамиз - Марказий Осиё учун катта аҳамиятга эга. Бу жамоат саломатлиги соҳасида халқаро даражага эришиш йўлидаги муҳим қадамдир. Вестминстер университети Жамоат Саломатлиги магистратура йўналиши йўлга қўйилгандан буён миллий соғлиқни сақлаш тизимини мустаҳкамлаш ва унга илғор халқаро тажрибаларни жорий этишга қодир бўлган соғлиқни сақлаш соҳасидаги профессионал кадрлар ва бошқарувчиларни тайёрлашга салмоқли ҳисса қўшиб келмоқда.

Суҳроб Салиев - Жамоат Cаломатлиги магистратура дастури раҳбари

ТХВУ Вестминстер университети (Буюк Британия) билан ҳамкорликда соғлиқни сақлашни бошқариш соҳасида мутахассисларни фаол тайёрламоқда.

Университет Ўзбекистон Республикаси Соғлиқни сақлаш вазирлиги билан яқиндан ҳамкорлик қилиб, соғлиқни сақлаш тизими учун бошқарув кадрларини тайёрлаш бўйича кенг қамровли қўшма дастур амалга оширмоқда. Мазкур дастур мамлакат соғлиқни сақлаш тизимига илғор халқаро тажрибалар ва инновацион ёндашувларни жорий этишга қодир юқори малакали бошқарув захирасини шакллантиришга қаратилган. 2024–2025 ўқув йили давомида Соғлиқни сақлаш вазирлиги ҳузуридаги Тиббиёт ходимларининг касбий малакасини ривожлантириш маркази билан ҳамкорликда 290 нафардан ортиқ раҳбар кадрлар ўқитилди.

Шуни алоҳида таъкидлаш жоизки, дастур доирасида Қозоғистон ва Тожикистондан 20 нафар соғлиқни сақлаш тизими ходимлари ҳам ўқитилди, бу ташаббуснинг минтақавий кўлами ва аҳамиятини таъкидлайди.

2 октябрь куни соғлиқни сақлаш ходимлари учун янги ўқув курси бошланди, у Ўзбекистон соғлиқни сақлаш тизимида барқарор ўзгаришлар ва инновациялар драйвери бўлишга қодир менежерларни тайёрлаш миссиясини давом эттиради.

ТХВУ аҳоли саломатлиги ва фаровонлигини яхшилаш ҳамда соғлиқни сақлаш соҳасидаги миллий ва глобал муаммоларни ҳал қилишга қодир мутахассисларни тайёрлаш учун ишлаб чиқилган Жамоат Саломатлиги бўйича халқаро магистрлик дастурини (MSc in Public Health Science) таклиф этади. У қуйидаги йўналишлар бўйича интенсив тайёргарликни таъминлайди:

• касалхоналарни бошқариш

• соғлиқни сақлашда менежмент, иқтисодиёт ва молия;

• эпидемиология;

• халқаро этика;

• тадқиқот усуллари;

• статистика;

• хулқ-атвор ва ижтимоий фанлар.

Мазкур дастур жамоат саломатлиги, тиббиёт ва ижтимоий фанлар соҳаларида илмий тадқиқотлар олиб бориш учун кенг имкониятлар очиб, Ўзбекистонда ва унинг ташқарисида ишлашга тайёр мутахассисларни тайёрлайди.

Sayt | Telegram | Instagram | Facebook | LinkedIn

Реклама ҳуқуқи асосида