Маск Марсдаги колония учун минимал қанча киши керак бўлишини ҳисоблаб чиқди

Илон Маск Марсни чинакам колонизация қилиш учун қанча одам кераклигини эълон қилди. Америкалик тадбиркорнинг сўзларига кўра, Қизил сайёрада барқарор аҳоли пункти яратиш учун камида 100 минг кўнгилли керак.

Фото: NASA

Унинг баёнотига Ars Technica шарҳловчиси Эрик Бергер билан Х ижтимоий тармоғидаги муҳокама сабаб бўлган. Журналист Starship транспорт тизими лойиҳаси истиқболига шубҳа билан қаради, бироқ бу кема бугунги кунда одамларни Ер орбитасидан ташқарига олиб чиқишга қодир ягона номзод бўлиб қолаётганини тан олди. Маск Starship муваффақиятига ишончи комил эканлигини ва бошқа сайёраларни колонизация қилиш учун аниқ «йўл харитаси»ни аллақачон шакллантираётганини айтди.

SpaceX раҳбарининг сўзларига кўра, Марсга қўнишнинг ўзи етарли эмас. Ўзини ўзи таъминлаш ва колонияни ривожлантириш учун шароит яратиш керак. Бунга эришиш учун Маскнинг фикрича, миссия иштирокчиларининг минимал сони 100 000 атрофида бўлиши керак — бу ҳамжамиятнинг ўзини ўзи таъминлаши учун зарур бўлган рақам.

Одамлардан ташқари, Ердан камида бир миллион тонна асбоб-ускуналар ва ресурслар етказилиши керак бўлади. «Марсдаги ҳамжамиятнинг омон қолиши ва ҳатто Ердан таъминоти узилган тақдирда ҳам гуллаб-яшнаши жуда муҳим», деб таъкидлади Маск. Унинг сўзларига кўра, бу жуда муҳим чегара бўлиб, ундан ошиб кетиш Марс колонизациясини ҳақиқатга айлантиради.

Тайёрлаган: Отабек Матназаров

#Марс #Илон Маск