Naked Science хабарига кўра, тасвир орбитал аппаратга ўрнатилган HiRISE юқори аниқликдаги камераси ёрдамида олинган. Унда Марснинг зарба кратерлари ичидаги йирик тузилмалар устида шаклланган оч рангли чўкинди қатламлари кўринади.
«Маржон рифлари» ибораси бу тузилмаларнинг ташқи кўринишини ифодалайди. Гап маржонлар ёки тирик организмлар ҳақида эмас, балки тўлқинсимон кўринишга эга геологик ётқизиқлар ҳақида бормоқда.
Қатламлар даврий жараёнлар билан боғлиқ бўлиши мумкин
HiRISE лойиҳаси тадқиқотчиси Кэти Вайцнинг изоҳлашича, қатламларнинг мунтазам такрорланувчи тузилиши ва Арабистон ерининг катта қисмида тарқалгани уларнинг глобал даврий жараёнлар билан боғлиқ бўлиши мумкинлигини кўрсатади.
Тадқиқотчилар бундай жараёнлар қаторида чанг бўронларини тилга олмоқда. Ерости сувларининг эҳтимолий иштироки ҳам кўриб чиқилмоқда. Ҳозирча булар қатламларнинг келиб чиқишини тушунтиришга қаратилган тахминлардир.
Айни пайтда чўкинди ётқизиқлари эрозия таъсирида емирилмоқда. Натижада уларда ўйиқлар, тишсимон шакллар ва нотекис четлар пайдо бўлган.
Кейинроқ шамол ташиб келган тўқ рангли материаллар ва жинс парчалари қатламларни қисман қоплаб, айрим чуқурликларни тўлдирган.
Орбитадан сайёра тарихини ўрганиш
Бундай тасвирлар олимларга Марс юзасини шакллантирган жараёнларни ўрганиш ва унинг иқлими вақт ўтиши билан қандай ўзгарганини тушунишга ёрдам беради.
Чўкинди қатламларининг тузилиши, тарқалиши ва емирилиш изларини таҳлил қилиш орқали тадқиқотчилар Қизил сайёранинг узоқ геологик ўтмишини босқичма-босқич тикламоқда.
