Мбаппеда голли серия, «Ливерпул»да тарихий мағлубият. Кун ўйинлари

Англия: «Ливерпул»да инқироз давом этмоқда

«Ливерпул» – «Манчестер Юнайтед» 1:2
Голлар: Мбемо, 2 (0:1). Гакпо, 78 (1:1). Магуайр, 84 (1:2)
«Ливерпул»: Мамардашвили, ван Дейк, Конате, Керкез, Брэдли (Вирц, 62), Макаллистер (Жонс, 62), Гравенберҳ (Экитике, 62), Собослаи, Гакпо, Салоҳ (Фримпонг, 85), Исак (Киеза, 72)
«Манчестер Юнайтед»: Ламменс, Магуайр, Шоу (Йоро, 85), де Лиҳт, Бруну Фернандеш (Майну, 85), Каземиро (Доргу, 59), Далот, Диалло (Угарте, 59), Маунт (Шешко, 61), Мбемо, Куня
Огоҳлантиришлар: Диалло, 52. Каземиро, 57

Сўнгги йилларда «Ливерпул» ва «Манчестер Юнайтед» даражаси ўртасида катта фарқ юзага келган. Шу билан бирга, ўзаро ўйинларда мерсисайдликлар мунтазам равишда очко йўқотиб келишмоқда. Яна шундай тенденция кузатилмоқдаки, Рубен Аморим даврида «МЮ» топ рақибларга қарши кучли тайёрланиб, натижага эришмоқда. Бу сафар ҳам «Энфилд»даги ўйиндан олдин мезбонлар яққол фаворит эди, аммо меҳмонлар яна бир бор барчани ҳайрон қолдиришди.

Футболчилар ҳали муҳитни ҳис қилиб улгурмасидан «Ливерпул» гол ўтказиб юборди. 62-сониядаёқ Амад Диалло Брайан Мбеумони голли пас билан таъминлади, футболчи жарима майдонига ёриб кирди ва яқин масофадан йўллаган зарбаси билан Георгий Мамардашвилига имкон қолдирмади.

Мавсум арафасида Мбеумо ва Диаллога майдонда бир вақтнинг ўзида жой топиб бериш муаммоси кўп муҳокама қилинганди. Аммо улар биргаликда яхши ҳаракат қилишмоқда. Бир неча дақиқа ўтиб ивуарлик футболчи яна бир ассист муаллифи бўлиши мумкин эди, аммо Бруну Фернандеш қулай позициядан яхши зарба бера олмади.

«Ливерпул» эса биринчи бўлимда «МЮ» билан тенгма-тенг курашди. Жамоанинг янги футболчилари, ҳали яхши спорт формасига кира олмаётган Флориан Вирц ва Жереми Фримпонг захира ўриндиғида қолганди, аммо Александер Исак бошланғич таркибдан ўрин олди. Швециялик ҳужумчи бу ўйинда ҳам жамоадан узилиб қолди. У олдинги спорт формасига қайтиши учун кўпроқ вақт талаб қилинмоқда. Муҳаммад Салоҳ ҳақида ҳам шу гапни айтиш мумкин, мисрлик ҳужумчи кетма-кет вазиятларни кўкка совурмоқда. Айниқса 65-дақиқадаги вазиятда яқин масофадан туриб аниқ зарба йўллай олмагани мухлисларнинг ҳафсаласини пир қилди.

Коди Гакпо эса жамоадаги энг яхшилардан бири бўлиб турибди. Аммо шу куни унга омад етишмади. Нидерландиялик вингернинг уч зарбаси дарвоза устунига борди. АПЛ тарихида фақат мерсисайдликларнинг собиқ ҳужумчиси Дарвин Нунес (тўрт) бир ўйинда устун ва тўсинни бундан кўпроқ пойлаган.

Умуман олганда, «Ливерпул» кўпроқ хавфли вазиятлар яратди ва мағлубиятга лойиқ эмасди. Мезбонларнинг 78-дақиқадаги жавоб голи ўйин мантиғига тўла мос келарди. Захирадан ўйинга қўшилган Федерико Киеза голли узатма муаллифига айланди, Гакпо эса ниҳоят мақсадига эришди. Нидерландиялик футболчининг бу зарбаси ҳам устунга тегиши мумкин эди, аммо у бу сафар мўлжални аниқ олганди.

Бу ўйинда дуранг адолатли натижа бўларди, аммо Ҳарри Магуайр бунга рози бўлмади. Марказий ҳимоячи стандарт вазиятда рақиб жарима майдонига борди ва ғалаба голини урди.

Сўнгги дақиқаларда «Ливерпул» рақибни жарима майдонига қамаб ташлади. Гакпо дубл расмийлаштириш учун яна бир ажойиб имкониятни йўққа чиқарди – унинг бир неча метр масофадан бошда йўллаган зарбаси бироз хато кетди. Ҳакам саккиз дақиқа қўшиб берди, аммо мезбонлар барибир «МЮ» ҳимоя деворидан ўта олишмади. Натижада «Ливерпул» қаторасига тўртинчи ўйинда ютқазди, бунақаси жамоада 38 йилдан буён кузатилмаганди.

Яқингача мерсисайдликлар беш очколик фарқ билан биринчи ўринда бораётганди. Энди эса пешқадам «Арсенал» билан орадаги фарқ тўрт очкони ташкил қилмоқда. «Манчестер Юнайтед» Аморим даврида илк бор АПЛда қаторасига икки ўйинда ғалаба қозонди. Бундан ташқари, «МЮ» «Энфилд»да тўққиз йилдан буён илк бор ғалабага эришди.

«Тоттенҳэм» – «Астон Вилла» 1:2
Голлар: Бентанкур, 5 (1:0). Роджерс, 37 (1:1). Буэндия, 77 (1:2)
«Тоттенҳэм»: Викарио, Дансо, ван де Вен, Спенс (Сарр, 86), Порро, Палиня, Бентанкур (Жонсон, 86), Симонс (Бергвалл, 79), Одобер (Коло Муани, 79), Қуддус, Тел (Ришарлисон, 60)
«Астон Вилла»: Мартинес, Конса, Пау Торрес, Дин (Матсен, 82), Кэш, Онана (Баркли, 82), Камара, Роджерс, Макгинн, Гессан (Буэндия, 61), Мален (Уоткинс, 61)
Огоҳлантиришлар: ван де Вен, 22. Дансо, 67

Мавсум стартида кўпчилик Томас Франк бошқарувидаги «Тоттенҳэм»нинг кучли ўйинларидан ҳайратланган, молиявий қийинчиликларга дучор бўлган «Астон Вилла»га ҳамдардлик билдираётганди. Унаи Эмери ёзда таркибни ўзи истаганча кучайтира олмади ва бирмингҳэмликлар стартда муваффақиятсизликка учрашди. Улар нафақат ғалабасиз серия қайд этишди, балки анча вақтгача гол ҳам ура олишмади, аммо октябр ўрталарига келиб барчаси ўзгара бошлади. Якшанба куни ҳам ўйин Бентанкурнинг тезкор голи билан бошланганди, аммо меҳмонлар вазиятни ўз томонига оғдира олишди.

Роджерснинг зарбаси бурилиш палласига айланди, иккинчи бўлимда эса Буэндия ҳам чирой борасида уникидан қолишмайдиган гол урди. Ўйини очилиб кетган аргентиналик футболчи сўнгги тўрт ўйинда уч гол уришга эришди — бу унинг олдинги 44 ўйинда йўллаган аниқ зарбалари сонига тенг. Қаторасига учинчи ғалабадан кейин «Вилла» 11-ўйинда жойлашган, аммо бешинчи ўриндаги «Челси» билан орадаги фарқ атиги икки очкони ташкил этмоқда. Эътиборли жиҳати, Эмери АПЛда Франк бошқарувидаги жамоаларга қарши мағлубиятсиз сериясини давом эттирди (+2=2), испаниялик мутахассис жамоаси қанчалик ўзига келганини бир ҳафтадан кейин кўрамиз — кейинги турда Бирмингҳэмда «Манчестер Сити» меҳмон бўлади. Қолаверса, Хосеп Гвардиола — Эмери учун энг ноқулай рақиб ҳисобланади.

Испания: Куртуа қутқарувчи ролида

«Хетафе» – «Реал» 0:1
Гол: Мбаппе, 80 (0:1)
«Хетафе»: Сория, Даконам, Дуарте, Рико, Иглесиас, Миля, Мартин (Камара, 87), Арамбарри, Санкрис, Кико Фемения (Ниом, 76), Лисо (да Коста, 90)
«Реал»: Куртуа, Эдер Милитау, Алаба (Раул Асенсио, 46), Каррерас, Валверде, Камавинга (Арда Гулер, 65), Тшуамени, Беллингҳэм (Диас, 86), Родригу (Гарсия, 86), Мастантуоно (Винисиус Жуниор, 55), Мбаппе
Огоҳлантиришлар: Дуарте, 48. Кико Фемения, 63. Санкрис, 74 – Тшуамени, 90
Четлатишлар: Ниом, 77. Санкрис, 84 (иккинчи сариқ)

Ла лиганинг кўп жамоалари «Хетафе»га қарши ўйинларда қийналади, «Реал» учун эса Мадрид чеккасидан бўлган ушбу жамоа — энг қулай рақиблардан биридир (сўнгги 11 ўйинда 10 ғалаба). Хаби Алонсо эса шундан келиб чиқиб, асосий эътиборни янги ҳафтада «Ювентус» ва «Барселона»га қарши ўйинларга қаратганди. У ҳали формасини тўлиқ тикламаган Винисиус Жуниор ва Арда Гулер билан таваккалчилик қилишни истамади ва уларни захирада қолдирди.

Терма жамоадан жароҳат билган қайтган Мбаппе эса бу ўйингача тикланишга улгурди. Килиан биринчи бўлимда майдондаги энг фаол футболчилардан бири бўлди ва жисмоний ҳолати жойида эканини намойиш этди. Шу билан бирга, меҳмонларда рақиб мудофаасини енгиб ўтиш ва ҳужумларни якунлашда муаммолар кузатилди. Натижада мураббий Винисиусни майдонга туширишига тўғри келди, бразилиялик ҳужумчи эса ўз ҳаракатлари билан икки бор рақиб футболчиси майдондан четлатилишига эришди. Аввалига майдонга тушганига кўп бўлмаган Ниом унинг юзига уриб юборди ва тўғридан тўғри қизил карточка олиб, кийим алмаштириш хонасига йўл олди. Бу вақтда у захирадан ўйинга қўшилганига 39 сония бўлганди.

Ва дарҳол шундан кейин Гулер «Хетафе» мудофаасида юзага келган бўшлиқдан фойдаланиб, нозик узатма билан Мбаппени қулай вазиятга чиқарди, француз ҳужумчиси эса қаторасига 11-ўйинда гол урди. Кўп ўтмай Алекс иккинчи бор сариқ карточка олди (у ҳам Винига қарши қўполлик учун) ва шундан кейин ўйин масаласи ҳал бўлгандек кўринди. Аммо мезбонлар тўққиз киши ҳолатида ҳам қўшимча дақиқаларда ҳисобни тенглаштириши мумкин эди. Аммо Куртуа эпик сейвлари коллекциясини тўлдиришда давом этди ва «Қироллик клуби» класико арафасида яна турнир жадвалида пешқадам бўлиб олди.

Италия: «Юве»да илк мағлубият ва Пиолининг ғамгин юбилейи

«Комо» – «Ювентус» 2:0
Голлар: Кемпф, 4 (1:0). Пас, 79 (2:0)
«Комо»: Бюте, Диегу Карлос (Рамон, 46), Кемпф, Смолчич (Пош, 86), Какере (Вале, 68), Перроне, Да Куня, Морено (Дувикас, 68), Войвода, Пас, Мората (ван дер Бремпт, 90+1)
«Ювентус»: Ди Грегорио, Келли, Ругани (Костич, 83), Камбиясо (Жоао Мариу, 83), Калюлю, Локателли (Маккенни, 77), Тюрам, Копмейнерс (Влаҳович, 77), Кенан Йилдиз, Консейсау, Давид
Огоҳлантиришлар: Морено, 12. Смолчич, 22. Диегу Карлос, 34 – Келли, 10

Шанба кунги ўйинлар натижаларига кўра А Серияда турнир жадвалининг юқори қисмида «Интер», «Наполи» ва «Рома» бир хил очко тўплаб, триумвират ҳосил қилишди. Бир кун ўтиб уларнинг сафига «Ювентус» қўшилиши мумкин эди, аммо туринликлар Арсен Венгер, Тиерри Анри ва Рафаэл Варан трибунадан ўтириб кузатган ўйинда «Комо»га ютқазди ва ушбу жамоани ўзидан олдинга ўтказиб юборди.

Бянконерилар учун бу жорий мавсумдаги илк мағлубият, худди шу рақибга қарши ўйинларда 1952 йилдан буён илк бор очко йўқотиш бўлди. Сеск Фабрегас бошчилигида мухлисларга ёқадиган комбинацион футбол намойиш этаётган жамоа аввалига 4-дақиқадаёқ бурчак зарбасини оригинал ижро этган ҳолда туринликларни ажаблантиришди. Нико Пас тўпни ерлатиб, жарима майдони бурчагига етказиб берди, кейин ўзи ҳам шу томон югурди ва тўпни қайта қабул қилиб олиб, Кемпфни голли пас билан таъминлади. Ўйин охирларига бориб «Кекса синиора» катта куч билан олдинга ўтганида мезбонлар намунали қарши ҳужум уюштиришди ва Пас чиройли зарба билан олис бурчакни аниқ нишонга олди. Аргентиналик яримҳимоячи бу мавсумдаги голлари сонини 4 тага етказди, унда яна шунча голли узатма бор, у топ-5 лигаларда «гол+пас» бўйича фақат Винисиус Жуниор ва Луис Диасдан (5+4) ортда қолмоқда.

«Милан» – «Фиорентина» 2:1
Голлар: Гозенс, 55 (0:1). Леау, 63 (1:1). Леау, 86 – пеналти (2:1)
«Милан»: Менян, Габбиа, Павлович, Томори, Риччи, Модрич, Фофана, Бартесаги, Атекаме (Хименес, 57), Салемакерс (де Винтер, 90), Леау (Мюл-Балентин, 90+3)
«Фиорентина»: де Хеа, Мари, Раньери, Понграчич, Мандрагора (Жеко, 88), Николусси Кавиля (Зом, 87), Фаджоли, Гозенс (Паризи, 69), Додо, Кин (Пикколи, 77), Фаццини (Гудмундссон, 70)
Огоҳлантиришлар: Атекаме, 50. Фофана, 60. Томори, 74 – Николусси Кавиля, 54. Паризи, 85. Раниери, 88

Стефано Пиолининг «Сан-Сиро»га қайтиши у қадар яхши даврда рўй бермади. Унга «Фиорентина»ни янги даражага олиб чиқиш вазифаси қўйилганди, амалда эса жамоа олти турда бирорта ғалабага эришмади ва турнир жадвалининг қуйи қисмида қолмоқда. Миландаги ўйин арафасида у истеъфо ёқасига келиб қолганди – ҳолбуки бу унинг А Сериядаги юбилей 500-ўйини эди. Унинг шогирдлари бу ўйинда табиийки иккинчи рақамда ҳаракат қилишди – улардан биринчи навбатда гол ўтказиб юбормаслик талаб этиларди.

Фақат бу манзара биринчи бўлим ҳақида, танаффусдан кейин эса меҳмонлар ташаббусни қўлга олишди ва ҳисобни очишди. Терма жамоада олган жароҳати жиддий бўлиб чиқмаган Мойзе Кин Раниерининг узатмасига етиб бора олмаганди, аммо Менян тўпни шундай қайтардики, тўп унинг жамоадоши орқали Гозенснинг оёғига бориб тушди.

Шундан кейин Рафаэл Леау катта саҳнага чиқди. «Ювентус» билан голсиз дурангдан кейин бош мураббий Массимилиано Аллегри танқидига учраган португалиялик футболчи танқидга тўғри реакция кўрсатди. У аввалига олис масофадан йўллаган зарбаси билан Де Хеага имкон қолдирмади.

Кейинги вазиятда испаниялик посбон Сантияго Хименеснинг тўсин остига борган зарбасини тўсиб, жамоасини қутқарди. Аммо захирадан ўйинга фаол қўшилган ушбу мексикалик ҳужумчи пеналти ишлади, Леау эса дублни расмийлаштирди. Бу ғалабадан кейин «Милан» турнир жадвалида яккапешқадамга айланиб олди, Пиолининг истеъфоси эса янада яқинлашди.