Франциянинг собиқ президенти, сайлов кампаниясини хориждан молиялаштирганлик учун «Ливия иши» деб ном олган иш бўйича беш йилга озодликдан маҳрум этилган Николя Саркози Париждаги Санте қамоқхонасига келди. У Франциянинг ҳақиқий қамоқ жазосига ҳукм қилинган биринчи собиқ президенти бўлди ва ўз муддатини шахсий душга эга бир кишилик камерада ўтайди – ҳеч бўлмаганда суд унинг ҳукм устидан шикоятини кўриб чиқмагунча.
Маҳаллий вақт билан соат тахминан тўққиз яримда Саркози ўтирган автомобил Париждаги Санте қамоқхонаси дарвозаси олдига етиб келди, деб хабар берган Reuters.
«Мен қамоқдан қўрқмайман. Мен Сантега кираверишда бошимни баланд кўтариб ўтаман», – деган Саркози Tribune Dimanche нашрига берган интервюсида.
Суд ҳукмни деярли бир ой олдин, 25 сентябрда чиқарган, аммо Саркозига ҳукм кечиктирилган: уни суд залида ҳибсга олишмаган, балки ишларни якунлаш ва қамоқхонага мустақил равишда келиш учун вақт беришган.
2007-2012 йилларда Францияни бошқарган собиқ президент 2007 йилги сайлов кампаниясини молиялаштириш учун Ливиянинг ўша вақтдаги президенти Муаммар Қаззофийдан миллион евро олишга алоқадор деб топилган.
Сайлов кампаниясини ноқонуний молиялаштириш, Ливия давлати маблағларини суиистеъмол қилиш ва коррупцион схемада пассив иштирок этиш каби бошқа жиноий ишлар бўйича Саркози оқланди. У ўз айбига иқрор бўлмади, жараённинг сиёсий мотивлари борлигини айтди ва аллақачон ҳукм устидан апелляция берди.
Сантега кетаётганида Саркози Х ижтимоий тармоғида «қасос ва нафрат қурбони бўлгани» ҳақида ёзди. «Мен француз халқига ўзимга хос қатъий куч билан айтмоқчиманки, бугун эрталаб республиканинг собиқ президенти эмас, балки бегуноҳ одам қамоққа олинади», – деган у.
Сешанба куни эрталаб Саркози ва унинг рафиқаси Карла Брунининг Парижнинг 16-туманидаги уйи олдида собиқ президент тарафдорлари тўпланди. Унинг оиласи, жумладан, ўғиллари ва собиқ рафиқаси Саркозини қўллаб-қувватлашга ва у билан бирдамлик билдиришга чақирди.
Қамоқхонага келишдан бир соат олдин Саркози билан Бруни қўл ушлашиб уйдан чиқишди. Уларнинг уйи дарвозаси олдида тўпланган парижликлар «Николя, Николя!» деб ҳайқиришди, деб хабар берди Reuters мухбири воқеа жойидан.
«Мен у билан жуда фахрланаман, унинг қамоқхонага бошини мағрур кўтарганча ва ўз айбсизлигига ишончим комил ҳолда бораётганидан фахрланаман», – деди унинг акаси Гийом Саркози BFM TV телеканалига берган интервюсида. У ҳам собиқ президентга қамоқхонагача ҳамроҳлик қилган.
