Россия Украина бўйлаб зарбалар берди – фотолар

Россия 22 октябрга ўтар кечаси Украинага ракеталар ва зарбдор дронлар билан ҳужум уюштирди.

Киевда ҳужум оқибатида икки киши ҳалок бўлган. Улардан бирининг ўлими – Днипровск районида, ёнғин ичида қолган кўп қаватли уйда қайд этилган. Сўнгги маълумотларга, 19 киши жароҳатланган, шундан беш нафари болалар. Жабрланувчилардан тўққиз нафари шифохонага ётқизилган – булар беш нафар катта ёшли кишилар ҳамда тўрт нафар болалар, дея аниқлик киритди пойтахт мэри Виталий Кличко. Киевнинг бошқа районларида – Печерск, Деснянск, Дарницкий ва Соломенскда ҳам бинолар шикастланиши қайд этилган.

Киев областининг Бровари районида камида тўрт киши ҳалок бўлди, деб хабар қилди област ҳарбий маъмурияти раҳбари Микола Калашник. Унинг сўзларига кўра, қурбонларнинг уч нафари Погреби қишлоғидан – булар 38 ёшли аёл, 12 ёшли қиз ва олти ойлик чақалоқ. Ҳалок бўлганлардан тўртинчиси – 38 ёшли эркак.

Запорижжя областида камида 13 киши жароҳатланган, шундан икки нафари болалар, деб хабар берган област ҳарбий маъмурияти раҳбари Иван Федоров. 15 та кўп қаватли уйлар, хусусий уйлар ва нотурар жойлар шикастланган.

Харкивда Россия қўшинлари Холоднигор районидаги хусусий болалар боғчасига дронлар билан зарба берди, деб хабар қилди шаҳар мэри Игор Терехов. Унинг сўзларига кўра, бир киши ҳалок бўлган, яна беш киши жароҳатланган. Ярадорлар орасида болалар ҳам бор. Болалар боғчаси биносида ёнғин чиққан.

Одесса областининг Измаил шаҳрида Россия зарбдор дронлари ҳужуми оқибатида энергетика ва порт инфратузилмаси зарарланган, ёнғинлар келиб чиққан, деб хабар беради област ҳарбий маъмурияти раҳбари Олег Кипер. Унинг сўзларига кўра, жабрланганлар йўқ.

Ҳужумлар натижасида электрни авариявий ўчиришлар бошланди. ДТЕК энергетика компанияси Киев шаҳрида, шунингдек, Киев ва Днипропетровск областларида ўчиришлар жорий этилганини маълум қилди. Энергетика вазирлиги аниқлик киритишича, энергетика инфратузилмасига ёппасига ракета ва дронлар ҳужуми мамлакатнинг аксарият ҳудудларида фавқулодда узилишларга олиб келган. «Укрэнерго»нинг қўшимча қилишича, энг оғир вазият Суми ва Черниҳив областларида кузатилмоқда. «Укрзалізниця»нинг хабар беришича, зарбалар натижасида инфратузилмага зарар етган ва темирйўлда электр таъминоти узилган жойлар бор. Баъзи поездлар кечикиш ва ўзгарган йўналишлар билан кетмоқда.

Володимир Зеленский Украина бўйлаб зарбаларга изоҳ бераркан, жабрланган ҳудудларни санаб ўтди – Киев, Одесса, Черниҳив, Днипропетровск, Кировоград, Полтава, Винница, Запорижжя, Черкасс ва Суми.

«Россия урушни чўзиш учун етарлича босим ҳис қилмаётганини исботловчи яна бир кеча», – деб ёзган Зеленский. Унинг қўшимча қилишича, «Россия раҳбарияти „танқидий муаммолар“ни бошдан кечирмагунча, Россия дипломатияси ҳақидаги сўзлар ҳеч нарсани англатмайди». «Буни эса фақат санкциялар, фақат узоқни кўзлаш ва барча ҳамкорларимизнинг мувофиқлаштирилган дипломатияси билан таъминлаш мумкин», – деди Украина президенти.