«Ҳар сафар Владимир билан яхши суҳбатлар бўлади, лекин натижа бўлмайди. Менимча вақт келди», дея санкцияларга изоҳ берди Трамп. АҚШ Молия вазирлигига кўра, санкциялар Россиянинг энг йирик икки компанияси — «Роснефт» ва «Лукойл»ни нишонга олган. Мақсад — Москванинг уруш машинасини молиялаштириш имкониятини заифлаштириш.
АҚШ 22 октябрь куни Россиянинг йирик нефть компанияларига қарши санкциялар жорий қилди ва Россияни Украинадаги урушни тугатишга садоқатсизликда айблади. Янги санкциялар АҚШ президенти Доналд Трамп ва Россия президенти Владимир Путин ўртасидаги саммит режалари барбод бўлганидан бир кун ўтиб эълон қилинди. Трамп журналистларга «бу учрашув менга тўғри туюлмади» деб айтди.
АҚШ Молия вазирлиги маълум қилишича, санкциялар Россиянинг энг йирик икки компанияси — «Роснефт» ва «Лукойл»ни нишонга олган. Мақсад — Москванинг уруш машинасини молиялаштириш имкониятини заифлаштириш.
Reutersʼнинг ёзишича, бу қарор Оқ уй сиёсатида кескин бурилиш бўлди: Вашингтон сўнгги ойлар давомида Москвага босим ўтказиш ва муросага интилиш ўртасида иккиланишда эди. Фақат ўтган ҳафта Трамп Россияга қарши янги чоралардан тийилиш тарафдори эди.
«Энди қон тўкишни тўхтатиш ва дарҳол сулҳ эълон қилиш вақти келди,» — деди АҚШ молия вазири Скотт Бессент. Унинг сўзларидан сўнг нефть нархи бир баррель учун 2 доллардан ортиқ ошди.
Трамп узоқ вақт давомида Конгресс босимига қарамай Россияга энергия санкцияларини жорий этишдан бош тортиб келган. У Путин жангни тўхтатишга рози бўлишига умид қилган. Аммо уруш тугаш белгиси кўринмагач, у «вақт келди» деб ҳисоблади.
Трамп шунингдек, Украинага узоқ масофали «Tomahawk» ракеталарини беришга ҳали тайёр эмаслигини билдирди. НАТО бош котиби Марк Рютте билан учрашувда у «уларни ишлатишни ўрганиш учун украиналикларга камида олти ой керак бўлади,» деди.
Шунингдек, Трамп келаси ҳафта Хитой президенти Си Жинпинг билан учрашув арафасида «Си ўз таъсиридан фойдаланиб, Путинни жангни тўхтатишга ундашини» хоҳлашини айтди.
