Россия ядровий двигателга эга «Буревестник» қанотли ракетасини муваффақиятли синовдан ўтказди. Бу ҳақда 26 октябр куни Россия армиясининг бошқарув пунктларидан бирига ташриф буюрган президент Владимир Путин маълум қилди. Ўтган ҳафтадаги ядро машқлари билан бирга ўтказилган ушбу синовлар – Россияга санкциялар кучаяётган бир пайтда коллектив Ғарбга сигнал деб ҳисобланмоқда.
«Буревестник» қандай қурол?
Россиянинг қуролли кучлари Бош штаби бошлиғи, генерал Валерий Герасимовга кўра, ракета 21 октябр куни ўтказилган синовда 14 000 км масофага учган ва тахминан 15 соат ҳавода бўлган.
Ядровий энергия манбайи сабабли «Буревестник» бошқа ядровий қуролланган ракеталарга қараганда ҳавода анча узоқ вақт қолиши мумкин, деди Герасимов. У ҳар қандай ракетага қарши мудофаани енгиб ўтиши мумкинлиги айтилди.
«Буревестник» НАТО таснифида – SSC-X-9 Skyfall деб аталади. Унинг номи бўрон келишини олдиндан сездирувчи деб ҳисобланган «Бўрон қуши»дан (Storm petrel) олинган. У келажакдаги ракетага қарши мудофаа тизимлари учун «енгилмас» экани айтилмоқда. Шунингдек, деярли чексиз масофага ҳамда олдиндан тахмин қилиб бўлмайдиган парвоз йўлига эга.
«Кенг маънода бу – дунёда ҳеч кимда йўқ бўлган ноёб маҳсулот. Биз унинг бўлажак қўлланиш имкониятларини аниқлашимиз ва бу қуролни қуролли кучларимизда жойлаштириш учун инфратузилмани тайёрлашни бошлашимиз керак», – дея Путиннинг сўзларини келтирмоқда New York Times.
Россия етакчисига кўра, бир вақтлар россиялик мутахассислар бу қуролни яратиш имконсиз деб айтган, бироқ энди унинг «ҳал қилувчи синовлари» якунланган.
Ракета қаердан учирилгани, унинг парвоз маршрути қаердан ўтгани ва қаерга қулагани маълум қилинмаган.
