Норвегия Россиянинг “Буревестник” ракетаси учирилганини тасдиқлади

Норвегия Россиянинг чекланмаган масофага учишга мўлжалланган, ядровий қурилмага эга “Буревестник” қанотли ракетаси синовдан ўтказилганини тасдиқлади. Норвегия Ҳарбий разведка хизмати маълумотларига кўра, Россиянинг “Буревестник” ракетаси ўтган ҳафта Баренц денгизида жойлашган Новая Земля архипелагидан учирилган, деб хабар берди Reuters душанба, 27 октябр куни.

«Россия Новая Земляда узоқ масофага мўлжалланган Skyfall (“Буревестник”) қанотли ракетасининг навбатдаги синов учиришини ўтказганини тасдиқлай оламиз», — деди Reuters’га разведка хизмати раҳбари, вице-адмирал Нилс Андреас Стенсёнес.

Бундан олдин Россия президентининг сўзларини тасдиқловчи мустақил маълумотлар ёки “Буревестник” бўйича Ғарб ҳарбийларининг изоҳлари келтирилмаган эди.

Кремл сайтида стратегик ҳужумкор кучларнинг машқлари ҳақида баёнот эълон қилинди. Унда гўёки «стратегик ядровий кучларнинг учта таркибий қисми бўйича ўқув-жангoвар парвозлар бажарилгани» ва «кучли қурол-аслаҳа намуналари» — чекланмаган масофага эга, ядровий қурилмали “Буревестник” қанотли ракетаси — синовдан ўтказилгани айтилди. Путин “Буревестник”ни ўзига хос ишланма деб атаб, уни қўллашнинг «эҳтимолий усулларини аниқлаш» режалари ҳақида гапирди.

Ўз навбатида, РФ Бош штаб бошлиғи Валерий Герасимов “Буревестник” синови 21 октябр куни ўтказилганини, ракета 14 000 км масофани босиб ўтганини ва тахминан 15 соат ҳавода бўлганини билдирди. «Ракетанинг техник хусусиятлари уни ҳар қандай масофада юқори даражада ҳимояланган объектларга аниқ зарба бериш имконини яратади», — деди у.

АҚШ президенти Доналд Трамп бу баёнотни «ноўрин» деб атади. Унга кўра, Путин бундан кўра Украинага қарши урушни тугатиши керак. «Бир ҳафтада тугайди деб ўйланган уруш тўрт йилдан бери давом этяпти. У айнан шу билан шуғулланиши керак, ракета синовлари билан эмас», — деб қўшимча қилди Трамп ва АҚШнинг атом сувости кемалари ҳаракатлари ҳақида эслатди.

НАТОда Skyfall деб аталувчи “Буревестник” ракета лойиҳасига ўн йилдан ошиқ вақт бўлди. РФ ҳарбийларининг таъкидлашича, у двигателга ўрнатилган кичик ядровий реактордан қувват олади, бу эса назарий жиҳатдан уни бир неча кун ҳавода ушлаб туриш мумкинлигини англатади. Ядровий таҳдидлар бўйича Вашингтон ташаббуси (NTI)нинг 2019 йилги ҳисоботига кўра, Skyfall «ядровий қурилма олиб юради, Ер юзини паст баландликда айланиб учиши, ракетага қарши мудофаа тизимларини айланиб ўтиши ва релъефга мос йўлдан бориши, сўнгра олдиндан тахмин қилиш қийин бўлган жойга қурилмани учириши» мумкин.