Яна икки шаҳар ва учта туманда ҳокимлар ўзгарди

Андижон, Тошкент, Самарқанд, Жиззах ва Сурхондарё вилоятларида ҳокимлар алмашди.

Хонобод шаҳри

1 ноябр куни Андижон вилояти Хонобод шаҳри ҳокимлигида Халқ депутатлари шаҳар кенгашининг навбатдан ташқари сессияси бўлиб ўтди.

Вилоят ҳокими Шуҳратбек Абдураҳмонов иштирок этган сессия кун тартибида ташкилий масала кўриб чиқилди. Шаҳарга 2020 йил октябрдан буён ҳокимлик қилиб келган Машъалбек Тожибоев ўрнига Элёрбек Абдураҳмонов янги ҳоким этиб тайинланди.

У шу вақтгача Андижон вилояти Камбағалликни қисқартириш ва бандлик бошқармаси бошлиғи вазифасини бажарувчи сифатида ишлаб келаётганди.

Оҳангарон шаҳри

Тошкент вилояти Оҳангарон шаҳрида ҳам Халқ депутатлари шаҳар Кенгашининг навбатдан ташқари сессияси бўлиб ўтди.

Вилоят ҳокими Зойир Мирзиёев иштирок этган сессияда ташкилий масала кўрилди.

2024 йил февралидан буён шаҳар ҳокими лавозимида ишлаб келган Музаффар Ражаббоев ишда йўл қўйган хато ва камчиликлари учун лавозимидан озод этилди.

Зойир Мирзаев Оҳангарон шаҳар ҳокими лавозимига Оҳангарон тумани ҳокимининг қурилиш, тўсиқларсиз муҳит яратиш, коммуникацияларни ривожлантириш, экология ва кўкаламзорлаштириш масалалари бўйича ўринбосари вазифасида ишлаб келган Садриддин Шоқосимов номзодини тавсия қилган.

Депутатлар Шоқосимовни шаҳарнинг янги ҳокими этиб тасдиқлаган.

Нарпай тумани

Самарқанд вилоятида ҳам халқ депутатлари Нарпай тумани Кенгашининг навбатдан ташқари сессияси ўтказилди.

Унда Самарқанд вилояти ҳокими вазифасини бажарувчи Адиз Бобоев иштирок этди ва Нарпай туманини ижтимоий-иқтисодий ривожлантириш борасида олиб борилаётган ишлар, эришилган натижаларга тўхталди.

Сессияда ташкилий масала кўрилди. Вилоят раҳбари шу пайтгача Нарпай тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари – Иқтисодиёт ва молия бўлими бошлиғи вазифасида фаолият юритиб келаётган Анвар Болиевни Нарпай тумани ҳокимлигига тавсия этди.

Номзод депутатлар томонидан бир овоздан маъқулланди.

Маълумот учун, Нарпай туманига 2024 йил июлидан буён раҳбарлик қилган Шербек Бўронов 2025 йил августида Самарқанд вилояти ҳокимининг молия – иқтисодиёт ва камбағалликни қисқартириш масалалари бўйича биринчи ўринбосари – иқтисодиёт ва молия бош бошқармаси бошлиғи лавозимига тайинланган, шундан кейин туман ҳокимлиги бўш турганди.

Фориш тумани

1 ноябр куни Фориш туманида Халқ депутатлари туман Кенгашининг навбатдан ташқари сессияси бўлиб ўтди.

Жиззах вилояти ҳокими вазифасини бажарувчи Улуғбек Мустафоев иштирокидаги йиғилиш кун тартибида ташкилий масала кўриб чиқилди.

Унда вилоят ҳокими Фориш тумани ҳокими лавозимига Соҳиб Исломов номзодини депутатларга тавсия этди ва депутатлар ушбу номзодни Фориш тумани ҳокими этиб тасдиқлади.

Соҳиб Яхшибекович Исломов бугунги кунга қадар «Қишлоқ хўжалигида юқори технологиялар агротехнопарки махсус саноат зонаси дирекцияси» масъулияти чекланган жамият директори лавозимида фаолият юритиб келган.

Фориш туманига 2021 йил январидан буён Икром Матиев ҳокимлик қилиб келган. Унинг ишдан кетиш сабаби маълум эмас.

Сариосиё тумани

Халқ депутатлари Сариосиё тумани кенгашининг навбатдан ташқари сессияси бўлиб ўтди. Сурхондарё вилояти ҳокими Улуғбек Қосимов иштирок этган сессияда ташкилий масала кўриб чиқилди.

2023 йил январдан шу вақтга қадар Сариосиё тумани ҳокими вазифасида ишлаб келган Абдуқодир Донаев бошқа ишга ўтгани сабабли лавозимидан озод этилгани маълум қилинди. Вилоят раҳбари туман ҳокими вазифасига Одилжон Ёқубов номзодини таклиф қилди ва номзод туман Кенгаши депутатлари томонидан маъқулланди.

Одилжон Ёқубов 1983 йилда Олтинсой туманида туғилган. 2005 йилда Тошкент давлат иқтисодиёт университетини солиқлар ва солиққа тортиш мутахассислиги бўйича тамомлаган.

Меҳнат фаолияти давомида солиқ органларида турли вазифаларда, хусусан, Денов ва Термиз туманларида давлат солиқ инспекцияси бошлиғи, туман ҳокимининг биринчи ўринбосари лавозимларида ишлаган.

Тайинловга қадар Сурхондарё вилояти Камбағалликни қисқартириш ва бандлик бош бошқармаси бошлиғи лавозимида фаолият юритган.

• Бундан олдинроқ Навоий вилоятининг Кармана ва Навбаҳор туманларида янги ҳокимлар иш бошлагани хабар қилинганди.