Буюк Британиянинг энг бой тадбиркори Гопи Ҳиндужа вафот этди

Тадбиркор Гопичанд Ҳиндужа узоқ давом этган хасталикдан сўнг 85 ёшида вафот этди, деб ёзди Financial Times манбаларга таяниб.

Келиб чиқиши ҳиндистонлик бўлган Гопи Ҳиндужа The Sunday Times нашри талқинига кўра, Буюк Британиянинг энг бой одами ҳисобланади.

Унинг оиласининг бойлиги Hinduja Group компаниясининг банк сектори, кўчмас мулк, нефть, кўнгилочар ва транспортга киритган сармояси ҳисобига 35,3 миллиард фунт стерлингни ташкил этади.

Гопи Ҳиндужа 1959 йилда Ҳиндистон ва Эронда ташкил этилган оилавий бизнесига қўшилди. У камтарона савдо компаниясини йирик конгломератга айлантиришга ёрдам берди, деб ёзди FT.

Ҳиндужа ва унинг акаси Сричанд 1980-йилларда Лондонга кўчиб ўтди ва у ерда Hinduja Group компаниясига раҳбарлик қилди. Сричанд 2023 йилда вафот этди.