Орфан ва ирсий касалликларга чалинган болаларга ёрдам дастури тасдиқланди

Президентнинг ПҚ–331-сон (03.11.2025 й.) қарори билан 2026–2030 йилларда кам учрайдиган (орфан) ва бошқа ирсий-генетик касалликларга чалинган болаларга тиббий-ижтимоий ёрдамни ташкил этиш бўйича давлат дастури қабул қилинди. Ҳужжат бепул даволаш қамровини кенгайтириш ва таъминотни оширишга қаратилган.

Фото: iStock

Қарорга мувофиқ, дастурнинг асосий мақсадлари қуйидагилардан иборат:

давлат бюджети ҳисобидан бепул даволанадиган орфан ва ирсий-генетик касалликлар турини 5 тадан 10 тагача кенгайтириш;
ушбу тоифадаги болаларнинг дori воситалари, махсус озиқ-овқат ва тиббий жиҳозлар билан таъминланиш даражасини 95%дан 99%гача кўтариш;
болалар саломатлигини муҳофаза қилиш ва тиклашга қаратилган тиббий-ижтимоий хизматларни кенгайтириш.

Қўшимча тартибга кўра, 2026 йил 1 январдан орфан/ирсий-генетик касалликларга чалинган 18–21 ёшли беморлар бепул тиббий кузатувга олинади ва даволаш ишлари давом эттирилади.

Дастур доирасида диагностика ва реабилитация сифатини ошириш, таъминот занжирини барқарорлаштириш ҳамда оилаларни қўллаб-қувватлаш механизмлари босқичма-босқич жорий этилади. Қарор ижроси эрта ташхис ва барвақт даволаш имкониятларини кенгайтиради, тиббий ёрдамнинг шаффофлиги ва қамровини оширади.

Тайёрлаган: Отабек Матназаров

#президент қарори #орфан касалликлар