Бундесвер генерали: Россия НАТОга эртагаёқ ҳужум қилиши мумкин

Россия исталган пайтда НАТО мамлакатларига чекланган кўламда зарба беришга қодир, деб ҳисоблайди Бундесвернинг оператив қўмoндонлигини бошқараётган генерал-лейтенант Александер Золлфранк. «Ҳозир Россия нимага эга ва у шу билан нима қила олишини ҳисобга олиш керак, — деди Золлфранк 7 ноябр куни Reuters агентлигига берган интервюсида. — Шу нуқтадан келиб чиқиб, Россия эртагаёқ НАТО ҳудудига кичик кўламда зарба бериши мумкин».

Немис генерали бунда «ҳудудий даражадаги кичик, тезкор ҳужумлар»ни назарда тутаётганини айтди: «Катта амалиёт эмас — бунинг учун Россия Украинада жуда банд». Шу билан бирга, агар Москва қуролланишни давом эттирса, Золлфранк 2029 йилга бориб кенг кўламли ҳужум ҳам юз бериши мумкинлигини истисно этмади. Аммо бу рўй бериши, унинг фикрича, катта даражада Ғарбнинг позицияси ва ўзини тутишига боғлиқ бўлади.

Бундесвер оператив қўмoндонлиги бошлиғининг сўзларига кўра, Россия гибрид ҳужумлар орқали НАТОни қўзғатиш ва унинг реакция тезлигини синашни кўзлайди. Бу ҳужумларнинг ўзига хос жиҳатларидан бири — уларни аниқ тарзда классификация қилиш кўпинча имконсиз. «Бу — усул. Ва бу усулнинг мақсади — ишончсизлик уруғини сочиш, қўрқув уйғотиш, зарар етказиш, жосуслик қилиш, синаш, — деди Александер Золлфранк. — Бу қўрқитиш орқали уруш олиб боришдир».

У ўз позициясини Россия қўшинларининг салоҳияти билан асослади. Баҳо берилишича, Украинадаги йўқотишларга қарамай, РФ ҳарбий-ҳаво кучлари жанговар қудратни сақлаб қолган, ядровий ва ракета қўшинлари умуман олганда фойдаланилмаган ҳолатда қолмоқда. Қуруқлик қўшинлари йўқотишларга учраган, аммо РФдаги жанговар танклар сони шунчалик кўпки, чекланган ҳужумни ҳозироқ тасаввур қилиш мумкин. Бундан ташқари, Россия ўз қўшинлари сонини 1,5 миллион аскар ва офицергача ошириш ниятида.

Александер Золлфранк таъкидлашича, деярли 20 йилдан буён Москва Европада хавфсизлик архитектурасини ўзгартиришга қаратилган стратегик йўналишни олиб бормоқда ва Украинага қарши урушдаги катта йўқотишларга қарамай, шу йўлда давом этмоқда. НАТО бунга фақат «аниқ қизил чизиқлар» ўрнатиш ва яхши тайёргарлик ҳисобига рақибни тийиб туриш орқали қарши тура олади, деб ҳисоблайди Бундесвер генерали.