Австралия суди РФдан элчихона учун ажратилган ерни қайтариб олишни тасдиқлади

Австралия Олий суди 12 ноябр куни ҳукуматга Россия элчихонаси янги биноси қурилиши учун ер участкаси ижарасини бекор қилиш имконини берган қонуннинг ҳуқуқий асослилигини тасдиқлади. Шу билан бирга, энг юқори суд инстанцияси Австралия бу бекор қилиш учун РФга «оқилона миқдорда» компенсация тўлаши лозимлигини қайд этди, деб хабар беради dpa агентлиги.

Гап кетaётган ер участкаси Канберрадаги Австралия парламент биносидан тахминан 400 метр узоқликда жойлашган. Россия уни 2008 йилда 99 йиллик ижарага олган ва 3 миллион австралия доллари (тахминан 1,69 млн евро) тўлаган. 2022 йилда Миллий капитaл қурилиши бошқармаси ҳужжат берилган кундан уч йил ичида қурилишни якунламагани учун келишувни бекор қилганини маълум қилган. Бироқ суд бошқарма ҳаракатларини ноқонуний деб топган эди.

Шундан сўнг Австралия ҳукумати «хавфсизлик нуқтаи назаридан» ижара шартномасини бекор қилишини эълон қилди ва 2023 йил июн oйида бу бўйича қонун лойиҳасини парламентдан ўтказди. Бош вазир Энтони Албанезе сўзларига кўра, ҳукумат «парламент биносига шунчалик яқин бўлган янги хавф» тўғрисида жуда аниқ тушунтиришлар олган. Шу билан бирга, Австралия гап Канберрада РФ дипваколатхонасининг мавжудлигини тақиқлаш ҳақида эмас, балки фақат парламент яқинида элчихона қуриш масаласи ҳақида кетаётганини урғулаган.

Олий суд шу йилнинг ўша ойида ижара шартномасини бекор қилишга қарши Россия томони киритган даъвони рад этган эди. Кейин РФ дипмиссияси адвокатлари бунга имкон берган қонун конституцияга зид эканини исботлашга уринди.