Тошкент вилоятида қатор иссиқхоналарда филтр ўрнатилмагани аниқланди

Бош прокуратура ҳамда Экология, атроф-муҳитни муҳофаза қилиш ва иқлим ўзгариши вазирлиги ходимларидан иборат ишчи гуруҳ Тошкент шаҳар ва вилоятдаги иссиқхоналар фаолиятини текшириш бўйича тунги рейдлар ўтказмоқда. Қатор объектларда атроф-муҳитга зарарли ташламаларга оид қоидалар бузилгани аниқланди.

Фото: Экология, атроф-муҳитни муҳофаза қилиш ва иқлим ўзгариши вазирлиги

Текширувлар давомида, жумладан, Тошкент вилояти Тошкент туманидаги «Ҳасанбой гузари» МФЙ ҳамда Қибрай туманидаги «Парвоз» МФЙ ҳудудида жойлашган иссиқхоналар қозонхоналарида филтр ўрнатилмагани маълум бўлди. Бу ҳолатлар атроф-муҳитга зарарли моддалар чиқариш билан боғлиқ талаблар бузилиши сифатида баҳоланди.

Аниқланган қоидабузарликлар бўйича иссиқхоналарга нисбатан Маъмурий жавобгарлик тўғрисидаги кодекснинг тегишли моддаларига мувофиқ маъмурий баённомалар расмийлаштирилди.