Тошкентда чиқинди ташувчи техникалар ҳаракатини GPS орқали кузатиш яратилди

Пойтахт ҳокимлигининг хабар беришича, чиқинди ташувчи техникалар ҳаракатини GPS тизими орқали реал вақт режимида кузатиш учун Tozapoytaxt.uz ахборот тизими ишга туширилди.

Тизим фаолияти чиқиндилар соҳасидаги шикоят ва мурожаатларини қабул қилиш xalqnazorati.uz платформаси орқали марказлашган тарзда олиб борилмоқда.

Ҳавола орқали кирилса, пойтахт туманлари кесимида қанча чиқинди ташувчи техника мавжудлиги, улар йўлда ёки гаражда экани кўринади. Қанча вақтда, қачон қаерга етгани кўринмайди.

Маълумотга кўра, 2026 йил 1 январдан маҳаллалар кесимида ҳам чиқинди ташувчи техниканинг келиш вақти ҳамда йўналишини онлайн кузатиш мумкин бўлади.

Хабарда айтилишича, келгусида:

- маҳаллаларни чиқинди контейнерлари билан таъминлаш бўйича икки йиллик дастур эълон қилинади;

- кунлик чиқинди ҳажми онлайн тарзда очиқ эълон қилиб борилади;

- фуқаролар томонидан хизматларни баҳолаш механизми йўлга қўйилади;

- ташкилотлар билан тузилган шартномалар ижроси онлайн мониторинг орқали назорат қилинади.

Маълумот учун, Тошкентда маиший чиқиндиларни олиб чиқиб кетиш жараёни рақамлаштирилиши анча аввалроқ бошланганди. Ҳокимият “Тоза пойтахт” дастурий таъминотини ишга туширишини августда маълум қилган эди.

Тизим дастлаб тест режимида Олмазор туманида ишлаши, 1 сентябргача пойтахтнинг барча туманларига босқичма-босқич жорий этилиши режалаштирилганди.

Эслатиб ўтамиз, келаси йил 1 январдан бошлаб қаттиқ маиший чиқиндиларни тўплаш ва олиб чиқиб кетиш хизматлари учун ҳақ тўлашнинг янги тартиби жорий этилади. Унга кўра, энди санитар тозалаш соҳасида истеъмолчилардан фақат кўрсатилган хизматлар учун тўлов ҳисобланади.

Шунингдек, қаттиқ маиший чиқиндиларни тўплаш ва олиб чиқиб кетиш бўйича хизматлар учун тўловлардан тушган маблағлар бевосита Чиқиндиларни бошқариш ва циркуляр иқтисодиётни ривожлантириш агентлигининг махсус ҳисобрақамига йўналтирилади.