Sanitar tozalash sohasida iste’molchilardan faqat ko‘rsatilgan xizmatlar uchun to‘lov hisoblanadi

Endi chiqindi olib chiqish sohasida faqat ko‘rsatilgan xizmatlar uchun to‘lov hisoblanadi. Bu haqda Chiqindilarni boshqarish agentligi xabar berdi.

Qayd qilinishicha, sanitar tozalash xizmatlari sifatini oshirish va to‘lov intizomini mustahkamlash maqsadida 2026 yil 1 yanvardan boshlab qattiq maishiy chiqindilarni to‘plash va olib chiqib ketish xizmatlari uchun haq to‘lashning yangi tartibi joriy etiladi. Mazkur tartibga ko‘ra, endi sanitar tozalash sohasida iste’molchilardan faqat ko‘rsatilgan xizmatlar uchun to‘lov hisoblanadi.

Iste’molchilar (jismoniy va yuridik shaxslar) tomonidan qattiq maishiy chiqindilarni to‘plash va olib chiqib ketish bo‘yicha xizmatlar uchun onlayn to‘lov tizimlari orqali amalga oshiriladi.

Shuningdek, qattiq maishiy chiqindilarni to‘plash va olib chiqib ketish bo‘yicha xizmatlar uchun to‘lovlardan tushgan mablag‘lar bevosita Chiqindilarni boshqarish va sirkulyar iqtisodiyotni rivojlantirish agentligining maxsus hisob raqamiga yo‘naltiriladi.

Jamlangan mablag‘lar hisobidan haq to‘lash belgilangan sub’yektlarga (sanitar tozalash korxonalari, poligonlar, chiqindi yoqish zavodlari, ekosanoat hududlari va boshqalar) yagona tizim orqali quyidagi tartibda amalga oshiriladi:

- sanitar tozalash korxonalariga qattiq maishiy chiqindilarni poligonga yoki chiqindilarni qayta yuklash punktlariga topshirgani uchun (alohida tartib asosida tonna/kilometr hisobida);

- chiqindi poligonlariga/chiqindilarni qayta yuklash punktiga/chiqindilarni yoqish zavodiga chiqindilarni qabul qilgani va utilizatsiya qilgani uchun (tonna hisobida);

- ekosanoat zonalarida faoliyat yurituvchi tadbirkorlik sub’yektlariga (har bir tonnasi uchun) belgilangan tartibda to‘lab beriladi.

Har oy yakuni bilan xizmat ko‘rsatuvchi sanitar tozalash korxonalari faoliyatining asosiy samaradorlik ko‘rsatkichlari baholab boriladi, ular “qizil”, “sariq” va “yashil” toifalarga ajratiladi. Samaradorlik ko‘rsatkichi yuqori baholangan “yashil” toifadagi sanitar tozalash korxonalariga “qizil”, “sariq” toifadagilarga nisbatan ko‘proq haq to‘lanadi. Bu tartib sanitar tozalash korxonalarining KPI ko‘rsatgichlari asosida aniqlanadi.