Reuters: Американинг Chevron компанияси "Лукойл" активларини сотиб олишни ўйлаяпти

АҚШнинг Chevron нефт компанияси санкциялар остида қолган Россиянинг "Лукойл" компаниясининг чет элдаги айрим активларини сотиб олиш имкониятларини кўриб чиқмоқда. Reuters агентлиги бешта манбага таяниб 17 ноябр куни шундай хабар берди.

Фото: Эмин Джафаров / Коммерсантъ

Манбалар маълумотига кўра, Америка энергетика гиганти "Лукойл"нинг барча эмас, фақат Chevron билан алоқадор ёки кесишувчи активларини сотиб олиш вариантларини ўрганмоқда. Масалан, икки компания ҳам Қозоғистондаги Қарачаганак ва Тенгиз конларида нефт қазиб олади. Бундан ташқари, "Лукойл"нинг Нигериядаги OML-140 денгиз шелфида жойлашган лойиҳада улуши бор, бу ерда оператор сифатида Chevron фаолият юритади.

Америка компаниянинг Reuters сўровига жавобан "Лукойл" активларини эҳтимолий сотиб олиш ҳақидаги маълумотларни изоҳлашдан бош тортди, фақат компания ўз фаолиятига тааллуқли барча қонун ва қоидаларга риоя қилишини таъкидлаш билан чекланди.

Бундан олдин Reuters "Лукойл" активларининг эҳтимолий харидорларидан бири сифатида АҚШнинг Carlyle инвестиция компаниясини тилга олган, унинг битимни ўрганиши жараёни "илк босқичда" экани қайд этилган эди.

Bloomberg маълумотларига кўра, халқаро бозорда Россия компаниялари орасида энг кенг тармоққа эга корхона айнан "Лукойл" ҳисобланади. Россия нефт гиганти Европада нефтни қайта ишлаш заводларида улушларга, шунингдек Ироқдан тортиб Қозоғистонгача бўлган ҳудудларда жойлашган нефт конларида катта улушларга эга. Компания бренди АҚШдан то Белгия ва Руминиягача бўлган ҳудуддаги АЁҚШ (автомобилларга ёнилғи қуйиш шохобчалари) тармоқларида ҳам мавжуд.

Россиянинг "Лукойл" ва "Роснефть" нефт қазиб олувчи компаниялари, шунингдек, уларнинг 34 та шуъба тузилмаси жорий йил октябр ойида АҚШ ва Британия санкциялари остига тушган. Бу қарор Россиянинг Украинага қарши давом этаётган уруши фонида қабул қилинган.

Шундан сўнг "Лукойл" ўзининг чет элдаги активларини сотишга қарор қилди. Дастлабки харидор сифатида, Россия президенти Владимир Путиннинг дўсти Геннадий Тимченко ҳаммуассисларидан бири бўлган Швейцариянинг Gunvor компанияси кўриб чиқилган эди.

Вашингтон бу битимни тўсди, Gunvor’нинг Москва билан яқин алоқаларига ишора қилиб, Украинадаги уруш тугамагунча бу компанияга бизнес юритиши учун лицензия бермаслигини маълум қилди.

Тайёрлаган: Отабек Матназаров

#Лукойл #Chevron