2026 йилдан “Ёшлар дафтари” ёрдами янги қоида ва шартлар асосида амалга оширилади

“Ёшлар дафтари” жамғармалари орқали ижтимоий ёрдам кўрсатиш тизимини янада такомиллаштириш тўғрисидаги президент фармони қабул қилинди. Ҳужжатда ёшларни қўллаб-қувватлашда моддий ёрдам билан бирга, уларнинг таълим олиши, шахсий ривожланиши ва жамиятдаги фаоллигини кучайтириш устувор йўналиш сифатида белгилаб қўйилди.

Фармонга кўра, қуйидагилар асосий мақсадлар этиб белгиланган:

• “Ёшлар дафтари”га киритилган 16 минг нафар ёшнинг доимий даромад манбаига эга бўлишига кўмаклашиш;
• “Мутолаа” лойиҳаси доирасида илмий-оммабоп ва бадиий китобларни мунтазам ўқиб борувчи ёшлар улушини 10 фоизга ошириш;
• “Ибрат фарзандлари” лойиҳаси доирасида хорижий тилларни ўзлаштирган ёшлар улушини 30 фоизга етказиш.

Фармонга мувофиқ, 2026 йил 1 февралдан “Ёшлар дафтари” жамғармалари ҳисобидан белгиланган ижтимоий ёрдам турлари Камбағал оилалар реестрига киритилган оилалардаги ёшларга ижтимоий шартнома орқали қуйидаги шартлар асосида тақдим этилади:

• таълим олишни узлуксиз равишда давом эттириш;
• таълим жараёнида ижобий ўзлаштириш кўрсаткичларига эришиш;
• волонтёрлик фаолиятини амалга ошириш;
• “Беш ташаббус олимпиадаси” доирасидаги лойиҳаларда қатнашиш.

Мазкур янгиликлар “Ёшлар дафтари” орқали кўрсатиладиган ёрдамни шунчаки нафақат моддий қўллаб-қувватлаш, балки ёшларнинг билимли, фаол ва масъулиятли авлод сифатида шаклланишига хизмат қилувчи комплекс тизимга айлантиришни кўзда тутади.